Nan yon kominike ki sòti ayè aprèmidi jedi 16 fevriye 2023 a, sekretè deta ameriken an, Anthony Blinken anonse yo koupe viza 5 sitwayen ayisyen ak 7 moun ki ta fè pati fanmi sa yo. Daprè sa otorite ameriken an fè konnen, dezisyon sa yo gen gwo enpak sou moun ki ta gen konivans ak gang nan peyi a.
Nan kominike sila a, Blinken di sanksyon pou koupe viza moun sa yo, se yon sinyal Etazini voye pou montre klè kòman y ap lite pou konbat kòripsyon, epi frennen move zangi ki mete Ayiti nan sitiyasyon li ye la, men malgre tout sa ki di pa gen okenn enfòmasyon ki bay sou non moun sa yo ki ta tonbe anba sanksyon ameriken yo.
“Depatman deta lonje dwèt sou 5 moun mete sou 7 moun ki nan menm fanmi an kòm moun viza yo koupe jan atik 212(a)(3)(c)ki gen rapò ak lalwa imigrasyon ak nasyonalite di l”, se sa l di nan nòt la pandan l kenbe angajman pou kontinye fè sa pou lòt moun ki konn ap preche vyolans epi mete latroublay nan peyi a.
Yon lòt bò, responsab la raple ansyen prezidan Sena a, Joseph Lambert, Rommel Bell ak yon lòt pèsonaj li pa site, gen menm sanksyon koupe viza a sou do yo tou, men lwa sa li menm gen rapò ak atik 7031(c), selon presizyon l bay.
Pou kounya, menm jan Kanada sot sanksyone ansyen prezidan Ayisyen an, Jocelerme Privert ak mèt Sallim Succar, se menm jan an tou Etazini fè l men san yo pa site okenn non. Sepandan peyi Etazini pou kont pal gentan koupe viza 44 wo kad ayisyen, alòske Kanada li menm pran sanksyon kont 17 moun.
Atik sa se pwopriyete prive ©️ Gwoup Medya MAGHAITI 2023
