Lame Amerikèn fè konnen nan dat ki te 7 me 2024 la, li kòmanse deplwaye kèk eleman k ap gen pou itil misyon miltinasyonal an Ayiti a. Misyon sa a pral sou kontwòl peyi Kenya e objektif li se mennen batay kont gang ak kriz imanitè nan peyi d Ayiti.
«Kòmandman Sid lame Amerikèn ap gen pou kowòdone plizyè vòl avyon militè ameriken k ap gen pou pote kèk pèsonèl sivil k ap gen pou travay sou kontra, anplis materyèl ak ekipman Ayewopò Toussen Louvèti entènasyonal nan Pòtoprens. Moun sa yo pral gen pou travay ak moun nan ayewopò sa a pou sekirize ekipman ak founiti k ap gen pou rive Ayiti yo. Misyon sa a posib gras ak kowòdinasyon epi soutyen aktè konsène yo an Ayiti ki pral gen pou mete ayewopò entènasyonal Tousen Louvèti disponib pou penmèt operasyon sa a vanse», selon medya AFP.
Nan kominike Lame Amerikèn nan li fè konnen Kenya mete deplwayman li sou poz paske yo t ap tann Konsèy Prezidansyèl Tranzisyon an rantre an fonksyon, sa a ki te dwe fèt semèn ki sot pase a.
AFP soulinye gen yon gwoup 200 polisye kenyan ki ta dwe rive nan peyi a nan dat 23 me sa k ap vini an. Pou pòt pawòl Depatman d Eta Ameriken an, Matthew Miller : «Okenn dat pa ko rann piblik pou rezon sekirite operasyon an. Men, kèk bagay ap fòse n reyalize l lè sa a posib»
Pou fini, Lame Amerikèn ak Depatman d Eta prevwa fè 100 vòl sou Pòtoprens nan jou k ap vini yo la. Nou dwe konnen, Etazini dakò l ap kontribye avèk lajan l epi ekipman pou fòs sa a, men li p ap voye twoup oubyen polisye li yo nan misyon an.
Atik sa se pwopriyete prive © Gwoup Medya MAGHAITI 2024
