Gouvènman Brezil la retire 7 sitwayen Brezilyen ak yon Alman ayè mèkredi 10 Avril 2024 la. Yo fè sa a akoz sitiyasyon ensekirite a k ap vale teren chak jou epi plizyè Ayewopò k ap fèmen pòt yo nan Karayib la.
Peyi Brezil retire moun sa yo nan 2 vòl pa elikoptè pou ateri nan peyi Repiblik Dominikèn, presizeman nan vil Jimani, selon yon kominike ministè Afè etranje peyi Brezil la te mete deyò.
Gen divès lòt brezilyen ki montre anvi yo pou yo kite peyi d Ayiti tou, ki an total 59, men yo vle fè sa avèk pwòp mwayen pa yo. Anplis, yon granmoun Alman ta pral deside kite peyi a akoz sitiyasyon enkyetid ak laperèz ki genyen sou peyi a. Alman an se sou demann gouvènman peyi Ewopeyen yo li t ap pral gen posibilite pou l sove kite Ayiti.
Pandanstan, plizyè etranje ki t ap viv Ayiti oblije kite l, depi aprè atak bandi ak zam
sou divès enstitisyon piblik ak prive anba chapo gwoup gang Viv ansanm ki kontinye ap pran plis tèritwa nan peyi a.
Yon sitiyasyon panik ki gentan lakoz 107 enstitisyon prive ak piblik sibi zak briganday ak boule deja. N ap raple n tou gen plizyè sitwayen ki oblije kite lakay yo pou ale dòmi nan lekòl ak Plas piblik epi plizyè lage pye yo nan gran Sid la (Grandans, Sid, Sidès epi Nip) pou sove lavi yo.
Atik sa se pwopriyete prive ©️ Gwoup Medya MAGHAITI 2023
