Aprè yo te fin sakaje Fakilte Syans nan jou pase yo, fwa sa endividi ak zam rive mete dife nan ansyen lokal lekòl Nòmal Siperyè (ENS) jodi jedi 28 mas 2024 la. Selon divès videyo pou kounya batiman sa anba gwo dife.
Yon sous nou ka fè konfyans konfime nou
nèg ak zam pike dife nan lokal ENS la se vre, men daprè presizyon l pote batiman sa pa sèvi depi kèk ane, puiske responsab yo te leve l mete nan Riyèl Rivyè. “Lokal sa abandone depi lè Grégory Saint-Hilaire te mouri, se pa ENS ki Kanapevè a men se sa ki anba lavil la yo fin boule nèt”.
Sepandan, malgre lokal la pa t sèvi pou aktivite akademik yo, avèk dife sa ka gen materyèl ak dokiman ki pèdi. Men pou kounya, li rete ak responsab yo nan Inivèsite Leta Ayiti yo(ILA) pou tabli yon bilan aprè zak sila.
N ap soulinye pou sèlman mwa mas la, nèg ak zam sakaje, piye, boule divès enstitisyon edikatif, ak lopital nan peyi a. Pami yo nou jwenn lekòl frè No(École frère Nau), Fakilte DèSyans, Fakilte Agronomi ak Medsin Veterinè(FAMV), lopital Sen Franswa Sal, plizyè famasi ki twouve yo bò lopital jeneral, ak lòt ankò.
© Tous droits réservés – Groupe Média MAGHAITI 2024
