Pòtoprens jou mèkredi 20 novanm 2024 la._ Yo te toujou pale bandi yo ki pran plezi nan fè vyolans sou popilasyon an, yo te toujou di yo pou yo egzante dlo dous paske lè li monte se ravaj l ap fè. Ebyen sanzave pye blanch yo pa t janm vle tande larezon ; yo touye, yo vyole, yo kidnape epi atake moun yo vle, lè yo vle. Aprè 221 lane gwo batay Vètyè a nan dat 18 novanm pase a, bonèt pèp la chavire, lwa Ogou feray la monte nan tèt sitwayen yo, yo montre sa yo peze, yo bay bandi yo yon leson pou listwa.
Jou madi 19 novanm 2024 sa a ap rete grave nan tèt bandi yo paske pèp Petyonvil, Boudon ak Kanapevè lanse operasyon Bwa Kale 2.0 a. Kote plis pase 40 nan delenkan sa yo vwayaje pou peyi san chapo nan zòn nou sot site la yo. Nou paka bay chif yo egzat, gen sous ki di se 28, gen lòt ki di se 35, men direktè egzekitif òganizasyon k ap defann dwa moun nan RNDDH, Pierre Esperance li menm deklare se 45 bandi « Viv ansanm » ki tonbe.
Evènman yo ta pral kòmanse nan lannwit 18 novanm pou rive 19 novanm, kote yon patwouy lapolis ta pral tonbe sou yon kamyon chaje ak bandi nan Petyonvil. Polisye yo te rive toke kòn yo ak bandi yo ki lakoz anpil nan yo bwè dlo bouch yo menm kote a. Lapolis rive sezi kamyon ki t ap transpòte bandi yo, 2 dwon, radyo kominikasyon, plizyè zam ak anpil katouch. Nan zòn Pòsmachan lapolis sezi yon ti bis ki te gen zam ak materyèl sansib ladan l. Sa vle di, se te yon plan byen òganize pou teworis « Viv ansanm » yo te enstale baz yo nan Petyonvil, Boudon, Kanapevè ak lòt zòn ki touprè yo.
Envazyon sa pwouve nou teworis « Viv Ansanm » yo gen plan pou yo kontwole tout komin ki touprè kapital la, yon fason pou fasilite komès dwòg, kidnapin, trafik ògàn ak lòt aktivite kriminèl. Yo pa janm pran poz! Y ap veye nenpòt ti erè pou yo anvayi Kanapevè ak Petyonvil ki se 2 pyon enpòtan pou yo sou kat jeyografik la. Erezman pou nou 2 zòn sa yo se 2 senbòl rezistans, kote moun pa prèske dòmi nan veye move lawon. Moun yo òganize yo ase byen, yo fè brigad vijilans epi yo kontwole tout trafik machin ak moto k ap pase sou teritwa yo.
Pou moun ki pale anpil kòmkwa brigad sa yo pral transfòme an gang lan, n ap di yo pèp la pa egare li pap fè menm erè yo 2 fwa. Epi se polisye zòn yo ki responsab brigad yo, yo pa mache lage zam nan men ti jèn konsa konsa. Si w se yon sivil ki sou pòs pandan lannwit yo ka ba w kenbe yon zam, menm zam sa y ap pran l nan men w pou yo bay ranplasan w lan lè lè w fini. Toujou gen polisye k ap veye moun ki sou pòs yo, moun sa yo pa menm ka itilize telefòn pou evite toutè ak enfiltrasyon. Se yon sistèm ki byen òganize epi ki bay bon rezilta jiskaprezan. Se menm sistèm sa yo ki te gen kafoufèy jiskaske polisye ki te responsab sekirite zòn nan te pran lajan nan men gang Gran Ravin nan pou te dezame rès brigad la. N ap konprann poukisa moun Kanapevè agresif konsa, yo pa vle pran nan menm kou a.
Pou moun ki vle bòykote mouvman brigad la paske yo pè pou yo pa transfòme an gang aprè batay sa, n ap di yo poze san yo paske se sèl mwayen ki efikas nou genyen pou kounye a pou repouse bandi. Ni lapolis nasyonal la, ni lame pa gen ase mwayen pou elimine kansè sa k ap donnen toupatou nan peyi a. Se sèl maryaj ant lapolis ak popilasyon an ki ka bay bon jan rezilta sa yo. Menm Pierre Espérance chanje fizil zepòl, li fini pa rann li kont se kanpe goumen l ye.
Nan sans sa, li enpòtan pou moun nan dyaspora yo sipòte brigad katye yo nan fason pa yo, paske moun yo bezwen mwayen pou yo fonksyone. Nou pa di voye bal ak zam, nou paka ankouraje sa paske se travay lapolis, men fòk nou voye lajan pou yo fè kantin popilè, bay manje ak bwason pou brigadye yo epi achte materyèl pou sekirize zòn yo tankou filfè ak materyèl pou monte baryè. Brigadye se yon travay ki pran tout tan moun li ye, kidonk moun ki grangou paka goumen, nou sipoze jere mesyedam yo epa chita fè tapaj sou Facebook sèlman. Si bandi yo plen sipòtè blan ak politisyen, brigad katye yo dwe konte sou sipò dyaspora a pou kenbe mouvman an annatandan gen leta ak bon dirijan.
Fòk nou pa bliye tou grangou nan vant pa dous. Bandi yo pap pè vin ofri abitan nan zòn yo gwo lajan pou yo fè yo tounen toutè epi ajanten nan mitan baz nou, menm jan yo te achte polisye nan Kafoufèy la. Pou evite dezagreman sa yo, gen gwo kontwòl ki dwe fèt sou ajan brigad yo ak moun k ap frekante espas sansib yo. Fòk nou ranfòse sekirite a, mete kamera ki mache ak solèy nan kèk pwen enpòtan epi achte dwon pou nou kontwole teritwa nou yo. Si bandi yo byen òganize yo, nou menm nou dwe depase yo nan mòd òganizasyon nou yo.
Nan sitiyasyon nou rive la a pa gen benyen kache lonbrik ankò, nou menm nan Mag Haiti nou sipòte tout mouvman lejitim defans pèp la ap fè pou garanti byennèt li. Se vre nou se demokrat, nou pa patizan vyolans, nou ta toujou renmen lapolis arete bandi yo, men kòm teworis yo deside anvayi nou ak gwo zam fannfwà pandan nou pa nan gè ak yo, se nòmal pou nou defann tèt nou ak tout sa nou jwenn.
Pwovèb la di : baton ki nan men w lan se avè l pou w pare kou. Menm pwovèb la di tou pa pote tèt ou ale tankou ti kabrit san mèt. Timoun li granmoun konprann !
© Tous droits réservés – Groupe Média MAGHAITI 2024
