3 jou aprè piblikasyon òdonans jij Walter Wesser Voltaire ki prezante l kòm moun ki ta enplike nan lanmò prezidan Jovenel Moïse la, ansyen chèf lapolis la, Léon Charles deside remèt demisyon l kòm reprezantan Ayiti nan Òganizasyon Eta Ameriken yo (OEA). Nan lèt demisyon l lan, li eksplike li pran desizyon sa se paske l vle konbat tout move akizasyon k ap fèt sou do l nan dosye sa.
“Mwen remèt demisyon m antanke reprezantan pèmanan Repiblik Dayiti nan Òganizasyon Eta Ameriken yo. Imedyatman w resevwa l desizyon an ap konplè“, daprè sa ansyen chèf lapolis la ekri nan lèt sila ki adrese bay minis zafè etranjè ak kilt, Jean Victor Généus, pandan l pwofite defann tèt li pou fè konprann se yon òdonans moun pa ta dwe pran pou verite.
Konsa, li eksplike demisyone se pi bon desizyon l ka pran, puiske pòs li ye a anpeche l lib pou l fè plis aksyon pou montre inosans li nan ansasinay prezidan an. Se pou sa, pou sove lonè l li fè konnen l ap itilize tout vwa legal yo pou l f fè sa l dwe fè yo.
N ap raple, Léon Charles se youn nan 51 moun jij Walter Wesser Voltaire mande pou al pase douvan tribinal kriminèl san asistans jiri, nan kad enstriksyon sou ansasinay ansyen prezidan Jovenel Moïse la.
Atik sa se pwopriyete prive ©️ Gwoup Medya MAGHAITI 2024
