Alòske plizyè nan yo te chape poul yo nan evazyon penitansye a samdi pase, jounen jodi a lajistis ayisyèn libere 2 akize nan lanmò prezidan Jovenel Moïse la. Selon Radio Métronome, 2 moun sa yo menm jan ak kolonbyen yo te deside rete nan espas la malgre tout deblozay ki te genyen yo.
Reynaldo Corvington ak Dominick Cauvin se 2 premye moun sa yo ki jouskaprezan jwenn liberasyon yo aprè òdonans jij Walter Wesser Voltaire te sòti depi 19 fevriye 2024 la. Poutan daprè yon premye pati nan rapò a, menm majistra a te konkli pou di ni bòpè ni bofis sa yo te fè pati otè entèlektyèl ki te rive fini ak lavi ansyen chèf leta a.
Men sa Jij Voltaire te di sou yo nan yon premye tan: “Dominick Cauvin ki te arete 14 jiyè 2021 an, te deklare nan chanm enstriksyon kriminèl, li te patisipe yon fwa nan reyinyon ki te fèt kay Corvington yo kote moun sa yo te la tou: Gilbert Dragon, Roodolph Jaar, John Joël Joseph, Joseph Felix Badio, James Solage, Joseph Vincent ak yon etranje”.
Poutan pi lwen toujou, jij la di konsa aprè divès envestigasyon yo jwenn mesye Cauvin te konn toujou nan reyinyon konplotay ki te vize elimine ansyen kandida PHTK a. Pou sa k gade Corvington li menm, otorite nan lajistis la te soulinye pou fè konprann nan yon dènye reyinyon ki te fèt li te fè deklarasyon sa “se Sen Toma l ye, paske se lè li wè yo arete tout bon prezidan Jovenel Moïse l ap kwè manda a egzekite”, toujou selon sa k ekri nan òdonans jij la.
Paralèlman, nan yon dezyèm tan majistra a fè konnen malgre Corvington te konn patisipe nan reyinyon ak konplotè yo, Joseph Félix Badio te pran devan pou di mesye a pa t konn anyen nan koze planifye ansasinay prezidan an, ni l pa t bay okenn sipò puiske reyinyon ki te fèt lakay li a se te yon reyinyon enfòmasyon olye planifikasyon. Konsa tou, pou mesye Cauvin li menm, yo fè kwè li pa t janm gen manda dèyè l pou te pran l.
Boutofen, jij Voltaire te konkli pou di done ak temwanyaj yo genyen nan ankèt la pa pèmèt yo enkilpe mesye sa yo. Se tout sa yo ki ta eksplike rezon ki fè lajistis ayisyèn ta deside lage yo aprè anviwon 3 lane nan Penitansye Nasyonal. Pou kounya selon Kolektif Avoka k ap Defann Dwa Moun yo (CADDHO), avèk liberasyon sa yo ki fèt la rete sèlman 97 prizonye nan sila ki pa t sove yo.
Atik sa se pwopriyete prive ©️ Gwoup Medya MAGHAITI 2024
