Nan kad ankèt ameriken ap mennen sou ansasinay ansyen prezidan Jovenel Moïse la, jodi jedi 7 septanm 2023 a, ansyen militè kolonbyen Alejandro Rivera Garcia plede koupab douvan tribinal federal Miami an. Selon deklarasyon ki li nan tribinal la, dokiman an fè konnen Rivera admèt li te enplike byen fon nan divès reyinyon ki te konn fèt Ayiti oubyen Etazini yo ak lòt akize yo, selon Miami Herald.
“Rivera resi plede koupab piblikman nan konplo pou te aksepte bay materyèl pou touye prezidan ayisyen an, nan founi ekipman yo, nan konplo pou te kidnape oubyen touye yon moun sou yon teritwa ki pa Etazini. Anplis, li te akize dèske l t ap konplote pou fè kèk magouy kont Etazini”, daprè sa jounal floridyen an anonse aprè midi a.
Mete sou sa, yo soulinye ansyen sòlda a rekonèt li te konnen depi 2 semèn avan zak ansasinay Jovenel Moïse la, plan kidnapin nan te vinn chanje pou te pito touye ansyen prezidan. Konsa li avwe tou, li menm ak kèk lòt mèsenè kolonbyen, ayisyen ak ameriken te lakay prezidan an lè krim nan te fèt nan lannuit 6 pou rive 7 jiyè 2021 an.
Pou sa ki gen pou wè ak santans kolonbyen 45 lane a, jij federal Jose Martinez ap gen pou bay dènye dezisyon l 27 oktòb k ap vini la. Yon lòt kote, jounal la presize akize a ka pran prizon avi, men sa ka pa fèt konsa si pwokirè Monica Castro ak Andrea Goldbarg ta deside pran pitye pou li akòz Rivera li menm rive kolabore ak lajistis ameriken.
Bò kote pa lajistis ayisyen an, jij Walther Wesser Voltaire kontinye odisyon yo. Konsa, ayè mèkredi 6 septanm nan li rive tande 2 mèsenè kolonbyen, mete sou 2 lòt li te tande deja. Neil Caceres Durán, ak Victor Albeiro Cardonna se non 2 akize sa yo Jij la apèn tande.
N ap raple Alejandro Rivera Garcia se 2yèm pèsonalite aprè Rodolphe Jarr (ki deja kondane pou l pase rès vi l nan prizon), ki aksepte plede koupab nan kad dosye lanmò 58yèm chèf leta ayisyen an.
Atik sa se pwopriyete prive ©️ Gwoup Medya MAGHAITI 2023
