Djhaïly-Mots-Art yon jèn eslamè pral reprezante Ayiti nan Koupdimonn eslam 2023 nan peyi Lafrans sòti 15 pou rive 21 me kap vini la.
Kechler Justin Ki gen non atis li Djhaïly-Mots-Art, fèt nan vil Lewogann yon 23 mas, li se etidyan sikoloji ak lèt modèn nan inivèsite leta Ayiti (ILA), li rive kalifye pou koupdimonn eslam 2023 “grand Poetry slam” ki òganize nan peyi Lafrans.
Pou eslamè a te rive kalifye pou konpetisyon sila prosesis la pa t fasil. Li te dwe nan yon premye tan pran pri chanpyon nasyonal peyi Dayiti. Sa li te rive fè nan mwa desanm ane 2022 a, kote li te sòti chanpyon konkou eslam Federasyon Ayisyen Eslam ak Pwezi (FEHASP ) te òganize.
Nan ti pale Djhaïly-mots-art te fè ak Maghaiti li fè konnen “se ak yon santiman fyète” li pral reprezante ayiti nan Koupdimonn sa paske “sa pa rive chak jou”. Men yon lòt kote eslamè a fè konnen li gen preyokipasyon tou. Atis la ki ap fè eslam depi lane 2014- 2015 di se ” yon nesesite pou li ekri ki mennen li nan wout eslam”.
Pou kesyon preparasyon koupdimonn lan eslamè a di li te konnen wout la pa t ap fasil se sa ki fè li kontinye fè anpil jefò ak pwòch li yo pandan li ouvè pou tout sipò. Nan sans sa, li fè konnen ” Si yon moun oubyen yon antrepriz ta vle sipòte Ayiti, DJHAÏLY MOTS-ART, vwayaj la pou koupdimonn lan, li kapab kontakte nou nan TEL : 509 41904655
EMAIL: [email protected]”.
Atik sa se pwopriyete prive ©️ Gwoup Medya MAGHAITI 2023
