Pwotokòl 17 Oktòb pa t pran tan pou li salye chwa manm Konsèy Tranzisyon an fè kote yo pran Edgar Leblanc fils nan tèt konsèy la jounen jodi 30 avril 2024 la. Konsèy sa la se nan lide pou l retabli sekirite, pèmèt lavi reprann nan peyi a anplis relouvri lekòl jan sa dwe ye.
“Chwa sa se sòti nan yon konsansis politik ki pral ranfòse ak pwoteje epi pou pèmèt tranzisyon an reyisi. Ayiti dwe pran chimen estabilite li“, daprè sa kòdonatè Pwotokòl 17 Oktòb la, Delson Cius fè Mag Haïti konnen.
Edgar Leblanc Fils, gen 70 lane li se reprezantan Kolektif 30 janvye, li te ansyen prezidan Sena a nan lane 1996 pou rive 2000, sou banyè Òganizasyon Pèp k ap Lite (OPL). Kounya la avèk chwa 9 manm Konsèy la, li se prezidan ki pral mennen Konsèy Prezidansyèl Tranzisyon an.
“Pèp la di Ayibobo pou Edgar Leblanc ki rive prezidan konsèy la, avèk anpil onè ak satisfaksyon mwen salye chwa a. Fritz Alphonse Jean, Leslie Voltaire epi tout lòt manm KPT chapo ba pou angajman nou. Soufrans popilasyon an pa dwe janm sòti nan lespri nou“, se sa reprezantan pati Pwotokòl 17 Oktòb la soulinye pou nou, tousuit yo te fin bay non prezidan an.
Sou lòtbò, Òganizasyon Pèp k ap lite (OPL) li menm tou apwouve chwa ansyen senatè Edgar Leblanc fils pou dirije tèt Konsèy prezidansyèl la.
“OPL eksprime tout konfyans li nan kapasite ak entegrite ansyen palmantè a ki pral pran responsabilite yo ba li yo, presizeman nan jesyon leta nan pi wo nivo a, avèk angajman san fay li pral pran avèk lòt manm konsèy prezidansyèl yo“, selon sa pati a fè konnen atravè yon piblikasyon sou kont X li.
Atik sa se pwopriyete prive © Gwoup Medya MAGHAITI 2024
