Nan yon atik yo pibliye ayè vandredi 23 fevriye 2024 la, jounal Reuters fè konnen gen gwo malè pandye sou Ayiti avèk diri k ap sòti nan peyi Etazini yo. Selon sa yo rapòte sou yon etid inivèsite Michigan apènn fè, diri ki sòti nan peyi sa gen bon kantite metal lou, tankou asenik ak kadmyòm, ladan yo ki ka bay kansè ak moun ki konsome diri yo.
“Selon etid la konsantrasyon mwayèn asenik ak kadmyòm yo te 2 fwa pi wo nan diri enpòte sa yo pase sa ki fèt nan tè Ayiti yo menm, kèk echantiyon enpòte depase limit entènasyonal la mete yo”, daprè sa jounal la fè konprann kote yo presize se sèlman sou diri ki sòti Etazini yo yo fè etid sila. Yo soulinye tou, eta Louisiane, Texas, Arkansas se yo menm ki nan tèt lis eta ki fè eksplwatasyon diri ameriken.
Jounal la kontinye pou di, Ayiti enpòte 90 % diri e se prèske sèlman Etazini li achte yo. Selon etid inivèsitè a, se yon bann kontra ki te konn siyen nan epòk pwoblèm politik ki te genyen nan fen peryòd 1980 pou antre 1990 yo ki eksplike dominasyon diri ameriken ki genyen nan peyi a.
Nan rapò a gwoup ekspè ki fè l la, avèti tout moun pou di “tout diri ameriken ki Ayiti la li nonsèlman yon vyolans ekonomik pou peyizan ayisyen yo ki gen pwoblèm pou vann pwodui lokal yo a, men tou li se yon danje lwen pou sante konsomatè ayisyen yo. Ayiti ap enpote yon gwo ris“. Ankèt yo mennen depi nan lane 2020, montre sou chak ane ayisyen manje 85 kg(187 lb) diri kont 12 kg pou moun ki Etazini.
Nan sans sa, menm moun ki ekri rapò a mande pou gen ankèt ki fèt sou ekspòtatè diri ameriken yo, konsa tou yo mande pou l fèt plis nan lide pou bay jarèt ak sektè agrikòl ayisyen an. Sou menm pwen an, yo peze sou ijans ki genyen pou responsab ayisyen yo mete aksan sou règlemantasyon peyi a nan zafè sekirite alimantè.
Atik sa se pwopriyete prive ©️ Gwoup Medya MAGHAITI 2024
