Nan yon nòt ki sòti ayè vandredi premye mas 2024 la, direktè lapolis la Frantz Elbé, prezante kondoleyans li bay fanmi polisye yo ki te mouri nan sou komisarya bon Repo a, nan dat 29 fevriye ki sot pase a.
«Lapolis pran vrèman nòt sou zak asasinay bandi yo te fè sou polisye ak polisyè anndan sou komisarya bon Repo», daprè sa ki ekri nan nòt sila.
Gwoup gang Kanaran ki sou kontwòl Jeff Larose, ta pral asasinen 5 polisye nan divès pwomosyon 26èm, 31èm, 32èm epi 2 enspektè polis, pandan, yo t ap eseye reziste kont atak sila.
«Mesye bagay la melanje, rele CRO ak komisarya kwadèboukè paske n ap batay lontan, men nèg yo pa janm voye blennde bay nou alòske nou gen 2è tan n ap batay avèk yo la. Ekip ki pi prè a pote n ranfò», se te kri dezespwa youn nan viktim yo ki se Pierre Luciana pandan tout moman atak la, ki jounen jodi a mouri kite 2 timoun.
Sou yon lòt bò chèf enstitisyon polis la te ajoute:
«Direksyon an salye kouraj Ewo ak vanyan gason sa yo ki te deside rete nan pòs la pou defann li, sa ki rann diy ak admirasyon nou pou yo menm sosyete a tou, puiske yo te prete sèman pou pwoteje ak sèvi»,
aprè 24è tan asasinay polisye yo, kote kò kèk nan yo te pral retwouve anba men bandi yo epi menm maltrete ak viral sou tout rezo sosyal yo. Anplis, se yon zanmi ki te pral pran sou bourèt kò enspektè prensipal Junior Marion. Puiske, madanm li ak pitit li fenk ale nan pwogram imanitè Etazini, daprè sa Jounalis Luckson Saint-Vil te fè konnen.
Alòske ayè vandredi a, plizyè polisye te al manifeste devan direksyon Jeneral Lapolis la, presizeman Sendika Polis Nasyonal Dayiti (SPNH-17) a, pou montre endiyasyon yo, paske yo pa t mete drapo a ak demi ma epi denonse responsab yo akòz chak chèf gen yon blennde nan men yo, pandanstan anndan komisarya yo pa genyen youn menm.
«Poukisa depi gen manifestasyon gen plis pase 3000 polisye ki gentan disponib nan okazyon sa, men kou Lapolis bezwen ranfò ak nan difikilte, yo toujou pran tan pou yo vini», se deklarasyon Garry Jean-Baptiste manm SPNH-17, sou Radyo Karayib. Kòmkwa sa k t ap fèt la, se nan lide pou montre feblès Lapolis la ak jistifye vini fòs miltinasyonal la.
Pou fini nòt la, responsab PNH la di: «Enstitisyon an pwofite pou li adrese tout senpati li avèk fanmi yo epi kanmarad polisye parèy yo, men nou bay tout garanti enstitisyon an pral mobilize tout mwayen ak pran tout dispozisyon pou lajistis ka rann avèk viktim yo.»
Atik sa se pwopriyete prive ©️ Gwoup Medya MAGHAITI 2024
