Depi aprè aktivite komèsyal yo te finn reprann vandredi pase a, jounal dominiken yo fè konnen jodi lendi 18 novanm 2023 a, komèsan dominiken yo fè plis kòb chak jou ki pase. Se nan konsa, yo soulinye machann sa yo deklare yo vle pou komès la kontinye jan l ye a, epi pou 2 nasyon yo bliye kont ki te genyen pou konstriksyon kanal Wanament la.
Selon medya dominiken yo, jodi lendi a ankò gen plizyè milye komèsan ayisyen ki te travèse fwontyè a pou t al achte Dajabón. Yon aksyon ki kontinye mete lakontantman nan mitan machann dominiken yo paske sa fè anviwon 4 mwa depi yo t ap plede pèdi machandiz.
“Nou remake yon valè moun, e sa nou wè yo se anpil ayisyen, sa ki fè lavant yo ogmante chak fwa pi plis. Pwoblèm nan rezoud nan bon moman, gras ak otorite yo ki resi mete yo dakò sou kèk pwen”, daprè temwanyaj yon komèsan dominiken jounal N Digital rapòte.
Yon lòt kote, pou rann li pi fasil e pi rapid pou tout ayisyen sa yo ki al achte chak jou yo otorite dominiken yo deside toujou kontinye anrejistreman biyometrik, men nan yon lòt fason. Aprè yon ayisyen te finn anrejistre pou yon premye fwa, yo fè konprann tousuit aprè y ap ba li yon kat ki ap sèvi l a chak fwa l ap gen pou al sou teritwa yo a.
N ap soulinye nan mwa novanm nan, sektè prive dominiken an te revele yo pèdi chak mwa plis pase 100 milyon dola vèt depi lè fwontyè 2 peyi yo te fèmen an. Se pou sa, nan sektè pwodiksyon ze a gouvènman Luis Abinader la te deside mete sou pye pwogram “Nourrir avec Inespre au supermarché” pou te evite machann yo pèdi tout ze yo te konn pwodui yo.
Atik sa se pwopriyete prive ©️ Gwoup Medya MAGHAITI 2023
