Marc Marie Yves Mazile ki se chèf pwotokòl palè nasyonal la ak Whenchel Jeanty yon etidyan fakilte leta jwenn liberasyon yo ayè dimanch 5 mas 2023 a. Daprè pwòch viktim yo, se lajan fanmi yo met deyò ki fè moun sa yo rive jwenn libète yo.
Aprè l finn pase anviwon 14 jou nan men nèg ak zam, chèf pwotokòl palè nasyonal la resi libere nan lannuit dimanch 5 mas la. Selon kèk medya lokal se plizyè vèsman lajan fanmi an ta bay pou kidnapè yo te lage fonksyonè leta a.
Poutan, malgre viktim lan lage pa gen okenn presizyon sou chofè li a, li menm tou prezime bandi yo te kidnape l ansanm ak Mazile jou ki te dimanch19 fevriye a, nan dèlma 31.
Yon lòt bò, etidyan fakilte Dwa ak Syans Ekonomik (FDSE) lan ki se Whenchel Jeanty, ravisè yo te kidnape dimanch ki te 26 fevriye 2023 a, li menm tou libere pou lajan ayè dimanch lan.
Paralèlman, aprè zak kidnapin etidyan FDSE a te sibi a, anpil lòt etidyan te manifeste pou te mande liberasyon kamarad yo san kondisyon nan dat premye mas ki sot pase la. Yo t ap pwoteste pou di paran Whenchel pa gen mwayen pou bay ravisè yo gwo lajan yo te mande pou libere l lan(200 000$ vèt).
Atik sa se pwopriyete prive ©️ Gwoup Medya MAGHAITI 2023
