Sou sekretè Leta ameriken Brian Nichols te rankontre premye minis defakto Ariel Henry jounen jodi vandredi 9 jen 2023 a, pandan l te Bayamas epi tou pwofite fè konnen angajman gouvènman Ameriken genyen pou Ayiti.
«N ap kontinye kreye mwayen pou kapab gen yon konsansis politik nan lide pou penmèt òganizasyon eleksyon nan peyi a», selon deklarasyon Brian Nichols nan rankont li ak Premye minis defakto Ariel Henry.
Sou sekretè Leta ameriken an te pral kontinye pou li ajoute «Mwen rankontre Premye minis Ariel Henry pou soulinye angajman san kanpe nou avèk pèp Ayisyen an.»
Sou lòtbò a, peyi Etazini atravè ajans pou devlopman Entènasyonal (USAID), pare pou li ofri 53.7 milyon dola ameriken anplis pou reponn avèk bezwen popilasyon ayisyen an kont kriz imanitè k ap ravaje peyi a, selon kominike vis prezidan Kamala Harris nan dat 8 jen ki sot pase a.
Pandanstan, n ap raple se minis finans ak ekonomik, Michel Patrick Boivert, k ap jwe wòl premye minis aktyèl la, akoz absans premye Ariel Henry, ki ale nan yon rankont avèk plizyè chèf deta nan Kominote Karayib Mache Ansanm (CARICOM), ki pral gen pou fèt nan dat 11, 12 epi 13 jen 2023 a, nan peyi Jamayik nan kad dyalòg ant Ayisyen.
Atik sa se pwopriyete prive ©️ Gwoup Medya MAGHAITI 2023
