Aprè yo te finn atake yon ti bis Gonayiv nan zòn Kafou Pèy nan aprèmidi madi 24 oktòb 2023 a, bandi Savyen yo te rive touye kanmenm 3 sitwayen pami yo 2 fanm ki te nan wout pou t al vwayaje nan pwogram Biden nan. Anplis moun sa yo ki mouri, plizyè medya lokal fè konnen gen anviwon 6 lòt moun ki te rive blese ki kounya ap pran swen lopital.
Guerlande Prévil, ak Jésula Joseph se non 2 fanm sa yo ki rive pèdi lavi yo ayè madi a, alòske yo te gen pou vinn fè demach nan Pòtoprens pou te kite peyi a. Selon anpil temwen, se ta gang Savyen yo ki kache dèyè zak sila.
Yon lòt kote, Me Venson François ki se komisè gouvènman Senmak la li menm te rive konfime enfòmasyon an kote l fè konnen 3yèm kadav la otorite yo poko ka rive jwenn li. Pandantan sa li fè konnen tou, chofè bis la ki t ap fè trajè Gonayiv/Pòtoprens la pami moun ki blese yo tou, e ta dwe reponn kesyon lajistis tousuit aprè eta sante l ta pèmèt sa.
“Enfòmasyon pasaje yo di nou se dèske depi nan zòn Vila te deja gen alèt e gen moun ki te di chofè a kanpe, lòt chofè yo te kanpe men li menm li te deside avanse. Se sa k fè pou kounya menm si chofè a li pran bal tou l ap gen pou l reponn kesyon envestigasyon yo”, se sa komisè a deklare pandan li estime zak chofè a fè a se yon pwovokasyon li te ye.
Atik sa se pwopriyete prive ©️ Gwoup Medya MAGHAITI 2023
