Nan jounen mèkredi 25 janvye a, 6 polisye rive tonbe nan zòn Lyankou, nan moman plizyè ajan t ap tire ak bandi nan gang Savyen. Yon enfòmasyon komisè divizyonè Jean Bruce Myrtil konfime nan jounal Premye okazyon sou Radyo Karayib. Pami 2 lòt polisye ki te ale pran swen lopital, gen youn nan yo ki rive mouri jodi jedi a, selon Metronome.
Norabert, Kether, Donaldson, Maden, Felix epi Camille se non 6 polisye sa yo ki ta fè pati inite espesyalize «UDMO», ki rive pèdi lavi yo nan atak sa a nan menm jou mèkredi a. Aprè zak la, bandi yo fè videyo kò polisye yo epi pibliye yo sou entènèt la. Yon lòt polisye ki te blese ta pèdi lavi li jodi jedi a lopital.
Toujou selon sa kèk medya fè konnen, ta genyen pou pi piti 6 bandi ki bwè dlo bouch yo nan atak sila a, men sa pa anpeche lanmò polisye sa yo revòlte konsyans tout moun.
N ap raple sa poko genyen yon semenn kote bandi nan Petyonvil te touye 4 polisye nan yon atak.
Pou janvye 2023 a, polis nasyonal la pèdi 15 polisye, kote bandi san fwa ni lwa rive touye. Malgre machin blende ki te kòmande pou PNH la ka byen fè travay li, sa pa rive pote solisyon ak sitiyasyon ensekirite a.
N ap fè konnen zak sa yo rive nan yon moman kote gouvènman Ariel Henry a te mande Nasyonzini pou voye fòs lame nan peyi Dayiti pou ka konbat gang yo.
Atik sa se pwopriyete prive ©️ Gwoup Medya MAGHAITI 2023
