Bandi ak zam mete dife yon lòt fwa ankò nan yon sou komisarya Pòtoprens, presizeman komisarya Mache Salomon an ayè mèkredi 6 mas 2024. Yo fè sa nan anviwon 10è yo, pandan bal pa sispann tire nan plizyè lòt zòn.
Nèg ak zam pa sispann simen laperèz ak latwoublay anndan peyi a, lè n konnen plizyè sitwayen sivil te oblije kouri kite divès lokalite nan Kafoufèy pou yo, tankou Plas Jeremi, Ri kapwa, ri Kamo, riyèl Alèt, elatriye. Akòz piyaj epi dife yo t ap mete nan kay moun yo.
Anplis, endividi yo gentan piye plizyè enstitisyon nan menm zòn Kafoufèy la, presizeman lopital Saint François de Sales, lekòl «Femme Sage », kay La mane, Kotelam, elatriye. Tout zak sila yo fèt depi aprè yo te fin atake pòs komisarya Pòtay Lewogàn ak penitansye Nasyonal wikenn pase a.
Sou yon lòt bò, nan dènyè rapò Rezo Nasyonal k ap Defann Dwa Moun yo (RNNDH) sòti, yo fè konnen gen 6 polisye ak 9 komisarya ki boule ak piye epi 21 lòt enstitisyon piye ak sakaje nan peyi a sèlman nan ti bout tan sa. Pou polisye ki mouri yo, yo soulinye tout 6 ajan yo te mouri anndan komisarya Bon Repo a epi 2 machann yo menm te jwenn lanmò yo nan Maglwa Anbwàz ak Ri Kamo. Yon sitiyasyon jouskaprezan ki kreye anpil panik kote sitwayen pezib yo.
Atik sa se pwopriyete prive ©️ Gwoup Medya MAGHAITI 2024
