Yon jou aprè yo te fin kraze sou komisarya Matisan an, bandi ak zam kraze sou komisarya Gran Ravin nan nan lannuit mèkredi 22 me 2024 la. Endividi ak zam yo kòmanse ak operasyon sa yon fason pou anpeche fòs etranje a etabli baz li plizyè kote nan peyi a.
Nan divès imaj ki pataje yo, yo montre kòman batiman Gran Ravin nan kraze, sitiyasyon an pa diferan pou sou komisarya ki nan Matisan #1 an. N ap soulinye, pa gen okenn polisye nan zòn sa yo depi aprè bandi yo te atake zòn sa yo nan lane 2021 jiskaske yo te vin pran kontwòl espas sa yo kèk tan aprè.
Yon lòt kote, toujou sou baz pou anpeche polisye k ap sot nan plizyè nasyon yo opere nan peyi a, bandi Savyen yo menase pou kraze Palè 365 pòt nan ti Rivyè Latibonit. Se youn nan moniman istorik peyi a genyen ki gen 204 lane depi l te konstui. Selon deklarasyon pòt pawòl federasyon antreprenè agrikòl Vale Latibonit la, Bertide Horace bandi ak zam yo menase pou kraze tou komisarya ak konplèks administratif zòn nan.
2 espas Lapolis sa yo pa premye kote gang viv ansanm yo kraze aprè atak ame yo fè sou yo. Pami yo, nou jwenn sou komisarya Dèlma 3 a, sou komisarya Bon Repo a. Mete sou sa a, samdi ki te 18 me 2024 la, yo te tanmen menm operasyon sa kont prizon ak komisarya Kwadèboukè a epi prizon sivil Kabarè a.
N ap fè konnen, selon Miami Herald fòs miltinasyonal la ki te gen pou l antre Ayiti jodi jedi 23 me a pap vini ankò. Jounal ameriken an di se ta kèk materyèl enpòtan ki poko achete ki fè yo ta mete pou yon lòt dat rantre fòs la sou teritwa nasyonal la.
Atik sa se pwopriyete prive ©️ Gwoup Medya MAGHAITI 2024
