Byen bonè nan maten dimanch 8 oktòb la anviwon 15 endividi ak zam ki te abiye ak inifòm lapolis anvayi legliz Rendez-Vous Christ nan zòn Katalpa, kote yo rive kidnape yon ajan sekirite legliz la epi volè plizyè materyèl. Poutan, Pastè legliz la Julio Volcy fè konnen se li menm menm bandi yo te vinn kidnape anndan legliz la.
Menm jan plizyè videyo montre l sou rezo sosyo yo, se konsa responsab Rendez-Vous a rive konfime tout bon zak kidnapin ki fèt pandan sèvis dimanch sa. Mete sou sa, ansyen kandida pou pòs prezidan Federasyon Postestan Dayiti a(FPH) fè konnen bandi yo te vini espesyalman nan objektif pou te ale ak li.
“Jodi a nan 7è 25 nan maten pandan premye sèvis legliz nou, 15 endividi ak zam te antre pou te tante kidnape m. Twa nan yo te ak kostim vinn patisipe. Nan moman fratènite legliz la, mwen menm pèsonèlman m te salye youn nan yo san m pa konnen, jouskaske ekip mwen fè m konnen li ta moun ki te premye sinyale tantativ kidnapin nan“, daprè sa lidè relijye a fè konnen pandan li anonse tout moun li byen e li an sekirite kote l ye a.
Yon lòt kote, li fè konnen gras ak entèvansyon lapolis gen youn nan endividi sa yo ki rive pèdi lavi l, alòske yo menm bò kote pa yo, anplis yon moun yo endividi yo ale ak li yo rive pèdi plizyè ekipman ak bagay pèsonèl kèk manb legliz la.
Nan menm kad dosye sa, polisye Marc Elie Azaël ki te fè pati 22yèm pwomosyon lapolis la rive mouri tou. Selon Sendika Polis Nasyonal la(SYNAPOHA), polisye a mouri nan moman bandi yo t ap sot kidnape fidèl legliz pastè Julio Volcy a nan zòn Katalpa, Dèlma 75.
“Nèg yo kwaze ak polisye a ki te sou machin li yo fè l desann aprè yo tire l“, toujou daprè SYNAPOHA a.
Pou kounya, legliz la anonse tout aktivite yo te konn fè yo kanpe jouskaske yo pran lòt desizyon sou sa. Men, yo pa bay okenn detay pou ta konnen konbyen lajan kidnapè yo ta mande pou liberasyon ajan sekirite yo a.
Atik sa se pwopriyete prive ©️ Gwoup Medya MAGHAITI 2023
