Aprè yo te finn pran kontwòl 3 sou komisarya deja, Nèg ak zam yo pa chome fwa sa yo atake epi mete dife jodi dimanch 3 mas 2024 la, nan sou komisarya Kabarè a. Atravè kèk videyo sou rezo sosyal yo nou kapab wè se toujou menm pwosesis la endividi yo itilize, puiske aprè chak zak sa yo se yo menm ankò ki filme sèn nan pou montre tout moun pouvwa yo genyen nan peyi a.
“Kabarè nou ye la, nou met sa wouj an sann. nou fè polis yo vole ak tout cha, yo vole ba n zòn nan“, se deklarasyon youn nan endividi yo aprè zak la, ki pa sispann vante klan li a li estime lapolis pa t ka fè fas ak yo.
Nan nouvo atak sa, anplis lokal la ki pa epanye, men divès machin lapolis ap flanbe anba dife nan lakou sou komisarya a. Fas ak vag ensekirite a, popilasyon nan Kabarè a li menm kontinye ap kouri kite lakay yo pou al pran refij nan zòn ki pi lwen yo.
Malgre tout zak sa yo ki sible enstitisyon polisyè yo ak Palè Nasyonal, okenn otorite polisyè pa anonse okenn mezi pou ta ranfòse rès komisarya ki twouve yo nan 4 kwen peyi a, yon fason pou polisye yo yo menm ta gen plis mwayen pou kontinye batay la.
Atik sa se pwopriyete prive ©️ Gwoup Medya MAGHAITI 2024
