Bandi ak zam touye byen bonè direktè lekòl «Sœurs Sainte-Marie des Anges» lan jodi mèkredi 29 me 2024 la nan ri kapwa pandan bandi yo t ap eseye kidnape li.
Petit-papa Garcia Dominique, ki se non direktè lekòl «Soeurs Sainte Marie des Anges» pèdi lavi l bò 7è nan maten, aprè bandi ak zam te fin krible ak bal yon machin koulè wouj ak matrikil: AA 28138 li te sou li devan lekòl l ap dirije a.
«Direktè lekòl la te apèn ap pare pou l desann machin li pou l rantre lekòl li a, se nan moman sa a nèg ki sou moto ak zam ta pral mande pou l desann vit la, li te reziste epi li te resevwa plizyè bal. Zak sa a pase nan espas li konn mete machin li an. Transpò lanmò an te pouse viktim lan kouri machin li, jiskake li t ale antre tèt li nan yon mi.», se deklarasyon sa a yon temwen nan zòn lan te pataje ak Mag Haïti.
Ensidan sa a te lakòz yon panik nan ri kapwa a ak zòn ki anviwonnen li yo. Paran yo te prese vit ale chèche timoun yo lekòl yo, kèk lekòl te deside fèmen pòt yo byen rapid aprè zak asasinay sou direktè lekòl sa a.
N ap raple bandi ak zam te asasinen, Fritz Gérard Léonidas, ki se pwopriyetè GRAFITI nan zòn «Lafleur Ducheine», men ki te rann dènye souf li nan zòn Ri 6, nan dat 22 me 2024 la pandan yo t ap eseye kidnape li tou.
Bandi ak zam kontinye ap touye divès moun nan klas mwayèn nan k ap degaje yo anndan sosyete a.
Atik sa se pwopriyete prive ©️ Gwoup Medya MAGHAITI 2024
