Nan bilan yo bay sou divès tranbleman tè ki pase nan peyi a pou 4 premye mwa ane 2024 la, Biwo Min ak Enèji (BME) revele Ayiti pa t manke anpil pou te fè fas ak yon radmare. Sou 208 tranbleman tè yo di k te genyen, rapò a montre gen 93 sekous ki te fèt nan lanmè nou an, yon chif ki bay 44,7% daprè obsèvasyon ekspè yo.
«Pou chif tranbleman ki pase nan lanmè yo nou jwenn li 93, li bay 44, 7 % sa ki fè nou sipoze te ka gen yon danje tsounami si kondisyon yo te reyini pou sa a», daprè estimasyon otorite yo nan Inite Teknik Sismoloji (UTS). Pou kondisyon yo te reyini, yo mansyone fòk te gen fay nan lanmè a, men tou fòk pou pi piti li te nan nivo 6,5 nan echèl Richter a, epi pou pi wo fòk li te pase ak 50 km pwofondè.
Pi gwo nivo (magnitude) yo anrejistre yo te fèt nan mwa fevriye a. Daprè sa a ki di nan rapò yo a, youn se distans 39 km Lwès Pwentarakèt (Zile Lagonav) li te pase ak 4.4, epi lòt la se te ak 3,5 km nan Nòdès Titwou Nip li te fèt ak 4,2.
Yon kote, nan 208 tranbleman tè ki pase nan peyi a pandan peryòd 4 mwa sa a, espesyalis yo presize gen 183 ladan yo nivo yo pi piti oubyen egal ak 3, sa ki bay yon pousantaj 87,9 %. 86 lòt ki reprezante 41,3 % an, te souke ak yon pwofondè ki pi piti oubyen egal ak 10 km.
Selon Inite Sekous Sismoloji ak Biwo Min ak Enèji, men kòman chif 208 tranbleman tè a reprezante pou chak mwa yo: pou janvye a yo jwenn te gen 42 sekous, fevriye te gen 53, mas nan tèt lis la ak 58 sekous, epi mwa avril la li menm tè a te tranble pandan 55 fwa. Yon lòt kote, yo mansyone pou 9 depatman ki te touche yo Nòdwès souke 53 fwa, Nip te tranble 42 fwa, Lwès te 37 fwa, Grandans ak Sidès te tranble 21 fwa, Sid la te souke li menm pandan 18 fwa. Pou fini, yo jwenn Nò a sa te fèt 6 fwa, tandiske Latibonit ak Sant te sèlman sekwe 5 fwa.
Atik sa se pwopriyete prive © Gwoup Medya MAGHAITI 2024
