Iwològ Déborah Pierre pèdi lavi l jodi madi 12 novanm 2024 la, aprè l te fin resevwa bal nan men bandi nan Ri Kamo. Selon plizyè medya lokal, pwofesyonèl sante a te ak papa li nan moman aksyon an pase a, kote menm papa a ta sòti blese li menm anba bal.
« Nou pèdi Dr Déborah Pierre, medsen, iwològ anba kout bal asasen. Dòk nou ap sonje w anpil », daprè sa nou li sou paj «Dr Ça me dit» ki te anonse nouvèl lanmò espesyalis la.
Fòk nou di, lanmò doktè a pwovoke gwo lapèn lakay non sèlman kolaboratè, ak ansyen etidyan parèy li, men tou bò kote sosyete ayisyen an.
« Li te yon kamarad pwomosyon ki te gen anpil pasyon pou iwoloji. Bandi yo fè sa yo vle ».
« Ou paka ale anpè ak kout bal nèg yo».
« M pa kapab ankò ».
« N ap redi bay san nou epi se sa nou rekolte », se pami divès reyaksyon nouvèl sa pwovoke sou tout rezo sosyàl yo.
N ap soulinye, nan lane 2021, doktè epi iwològ Angelo Gousse te pataje kè kontan ak popilasyon an dèske viktim nan te resevwa diplòm li nan lekòl li ap dirije ki se Bladder Health and Reconstructive Urology Institute in South Florida kòm espesyalis nan iwoloji. Doktè Déborah Pierre te 4yèm grenn iwològ Ayiti te genyen.
Atik sa se pwopriyete prive © Gwoup Medya MAGHAITI 2025
