Nan nivo ensekirite ap ravaje peyi a, Minis afè etranje Jean Victor Généu ak Helen La Lime plede nan Konsèy Sekirite Nasyonzini pou Yon ranfòsman Lapolis Nasyonal Dayiti Kont gang isit nan dat Jedi 16 jen 2022.
Nan sesyon konsèy sekirite nan Biwo Entegeasyon Nasyonzini an Ayiti (BENA/BINUH), Minis afè etranje Jean Victor Généus ak reprezantan espesyal nan Òganizasyon Nasyonzini (ON/ONU) an Ayiti, Helen La Lime te pwofite prezante sitiyasyon malouk peyi a ap konnen akoz bandi k ap simen latwoublay nan plizyè katye.
Selon Jean Victor Généus ajoute pou li di: ” Divès aktivite gang ak zam yo kreye yon klima ensekirite Jeneral nan peyi a. Gouvènman Ayisyen deside fè anpil sakrifis pou li jwenn mwayen ki nesesè pou li bay ak Lapolis la, sa k ap penmèt li ofri yon travay efikas”.
Minis afè etranje, kontinye pou li ajoute: ” Difikilte n ap rankontre nan administrasyon Ayisyen pou n jwenn materyèl ak ekipman blende, kontinye mete Lapolis nan sitiyasyon enferyè parapò ak bandi yo, kote yo menm yo jwenn aksè achte akoz kontreband”.
Anplis, Minis afè etranje a, Jean Victor Généus, te pwononse nan Konsèy Sekirite Nasyonzini an : ” Nou pa swete kominote entènasyonal la vin ranplase Lapolis nan kad travay li, men nou pito swete wè yon Biwo Entegeasyon Nasyonzini (BENA/BINUH) k ap vin ranfòse ak ankadre epi akonpanye Lapolis nan manyè efikas. Paske, sekirite se yon byen piblik, se yon priyorite pou gouvènman, sitou ak popilasyon an ki bouke ak pwoblèm sa. Kidonk, fòk gen yon solisyon ijan ki dwe bay nan meyè delè pou n restore demokrasi an Ayiti”.
Pou responsab Biwo Entegeasyon Nasyonzini, Helen La Lime afime pi plis : ” Ayiti gen bezwen èd imedya pou li devlope Lapolis Nasyonal Dayiti pou l ka kontrekare zak kriminèl yo ak vyolans k ap monte tanzanzan”.
Poutan, lapolis manke aktyèlman resous materyèl ak finans ekonomik pou li ranpli misyon efikas li. Tout fwa li jwenn yo, l ap penmèt li ranfòse kapasite ak lojistik li yo nan sousi pou l monte Yon pwogram sekirite piblik sou baz ransèyman epi redui nivo ensekirite a.
Atik sa se pwopriyete prive ©️ Gwoup Medya MAGHAITI 2022
