8 oktòb 2022 a, peyi Venezyela te viktim yon glisman teren akoz lapli ki t ap tonbe san rete, sak te lakoz 54 moun te mouri nan vil ”De las Tejerias“. Aprè evènman sa a, gouvènman Ayisyen an te deside pote èd li bay peyi Venezyela.
Jounen jedi 3 novanm 2022 a, gouvènman ayisyen an remèt plizyè danre ak peyi Venezyela nan kad koperasyon pou soutni sila yo ki te touche nan vil Las Tejerías, selon sa anbasadè Ayiti nan Venezyela a Lesly David fè konnen.
«Nan non pèp Ayisyen an, ekselans Lesly David, remèt don danre sa yo ki p ap péri ak Mesye Ernesto Villegas, minis kilti an, an siy solidarite avèk sila ki viktim yo nan vil Las Tejerías. Ayiti ak Venezyela dwe toujou ini yo.», sa anbasadè a ekri sou kont Twitè li.
Yon lòtbò, responsab kilti nan peyi Venezyela te ekri sou menm rezo sosyal sa «Solidarite» gouvènman Ayisyen ak nou, pandan li te pwofite raple «Venzyela se premye peyi ki toujou la pou Ayiti, sitou lè li te nan bezwen.»
Responsab ayisyen an te pataje kèk foto pwodui yo, tankou sadin, luil, farin, diri, sik, asyèt, vè, elatriye.
N ap raple Venezyela se veritab peyi ki te vann Ayiti gaz ak bon mache nan yon koperasyon peyi sid ak sid ki te batize Petwokaribe. Gouvènman Venezyela toujou pran Ayiti pou zanmi li.
