Atelye Tanbou Plen Minwi fonde nan dat 11 mas 2022 nan lakou Pòtoprens. Lide pou mete yon lekòl k ap penmèt jèn aprann jwe tanbou gratis sòti nan Joseph Rony pou rive nan depatman Latibonit.
Daprè temwanyaj fondatè Atelye Tanbou Plen Minwi an, lespri ta pral enspire l ak yon non rezistans ki se Batala. Batala fèt nan 7èm seksyon komin Gwomòn men li grandi Gonayiv. Li se dansè, koregraf, tanbourinè epi djawentò.
“Mwen fonde lekòl Tanbou sa k ap fòme moun gratis nan peyi a, nan lide pou plis moun konnen ki sa Tanbou ye, ki enpòtans Tanbou genyen nan kilti peyi Dayiti, pou plis moun antre nan pratik Tanbou a“, selon sa fondatè lekòl la di.
Pou Batala, Tanbou se yon enstriman ki makonnen nanm ak lespri. “Lè Tanbou ap jwe li fè nanm rejui, li reveye konsyans“, toujou nan deklarasyon l.
Joseph Rony raple nou objektif Atelye Tanbou Plen Minwi ki se penmèt plis moun gen fòmasyon sou Tanbou. Li panse Tanbou a dwe aprann nan lekòl menm jan ak tout lòt matyè.
“Atelye a plase nan Ri Sentonore nan lokal «Move move Tonel Restoran Klèb», Atelye Tanbou Plen Minui kòmanse fòme moun sòti nan 7 lane ak kontinye“, selon pawòl pwopriyetè a.
Fòmasyon an dire pou pi piti yon lane. Yon moun ki fòme nan Atelye Tanbou Plen Minui kapab vin youn nan pwofesè Atelye a, moun nan ka fòme gwoup mizikal pa l epi li kapab jwe nan dyaz.
“Li enpòtan pou chak Ayisyen chèche konnen pouvwa Tanbou genyen nan sosyete nou an paske Tanbou se yon eleman enpòtan nan kilti nou epi li se senbòl rasanbleman, se rezon ki fè yo toujou di, depi Tanbou frape, Ayisyen leve danse”, nan konklizyon Joseph Rony.
Atik sa se pwopriyete prive ©️ Gwoup Medya MAGHAITI 2023
