Plizyè pèsonalite piblik ak enstitisyon politik pa sispann klewonnen byen fò pou di «prezidan tranzisyon an dwe youn nan jij kasasyon an» tankou Kolektif 5 Desanm, Lòd demokratik, Kongrè wanament, GRE, Federasyon Pwotestan, pou n site sa yo sèlman. Reprezantan Asosyasyon militè d Ayiti foure bouch yo nan koze a pou fè konnen, jounen jodi a 3 avril 2024, se pou chwa a fèt nan kou kasasyon an selon sa a konstitisyon an 1987 la mande.
«Nou dakò nou nan yon sitiyasyon eksepsyonèl, yo tèlman vyole konstitisyon an, m gen enpresyon li kouche l ap tann lòt moun vyole l toujou», Se sa a reprezantan òganizasyon an, Ashley Laraque, fè konnen. Li menm kontinye pou l di nan Radyo ak televizyon Karayib «Si n vle rantre nan eta kote tout moun gen respè pou lalwa, fòk nou repwoche pi prè konstitisyon an, sa ki fè jirispridans se sèl tranzisyon ki deja mache pandan tout tan sa a».
Sa a enpòtan pou n konnen, konsèy prezidansyèl Tranzisyon ki gen 7 manm ak 2 obsèvatè ladan l se evantyèl estrikti ki sou chimen pou pran tèt peyi a. N ap raple n tou gen anpil moun ki konteste konsèy sa a parapò ak kantite moun li gen ladan l epi difikilte aktè yo rankontre pou yo rive antann yo pou chwazi yon prezidan nan tèt li.
«Akò Mache komen karayib la (CARICOM) ki te fèt Montana ak lòt ankò, se yon pakèt antite politik swadizan majorite se Lavalas ak PHTK», se sa reprezantan Asosyasyon Militè d Ayiti, Ashley Laraque, ajoute pandan li rete kwè s on vyolasyon Souverente Ayiti.
Pou anpil lòt se nominasyon yon ansyen jij nan kou kasasyon se sa k solisyon an puiske nou nan yon sitiyasyon eksepsyonèl olye se CARICOM k ap dikte nou sa n dwe fè.
«Mou yo pa menm li, kote yo siyen desizyon CARICOM lan ki se egzije yo kòm premye kondisyon se pou yo aksepte entèvansyon militè nan peyi anba chapo Nasyonzini, ki se sa n sot pase pandan 20 ak 25 dènyè ane yo la, kote yo pa pral pran lòd nan men pèsonn kèlkeswa zak yo ta fè», Se kon sa a reprezantan Asosyasyon Militè D Ayiti, Ashley Laraque, fini entèvansyon l lan sou koze konsèy Prezidansyèl la.
Atik sa se pwopriyete prive ©️ Gwoup Medya MAGHAITI 2024
