Atravè yon seremoni ki te fèt nan Otèl Montana jounen jodi vandredi 31 mas 2023 a, premye minis Ariel Henry anonse lansman yon platfòm anliy pou demann paspò ak Kat idantifikasyon Nasyonal nan peyi a. Objektif la se ta amelyore sèvis la selon sa gouvènman anplas la ekri sou paj Fesbouk li.
«Ak efò ministè Enteryè ak Imigrasyon fè pou modènize akèy ak kontribiyab yo, gouvènman an ap rantre tout bon nan I-gouvènans. Nou gen pou nou kontinye fè sa nan lòt administrasyon yo tou, pou nou ka bay pèp la pi bon sèvis», toujou selon sa responsab kominikasyon Primati an enfòme.
Depi lè gouvènman Ameriken an vin avèk Pwogram imanitè “Parole” la, kantite demann pou pyès idantite Nasyonal ak paspò ogmante, se yon dividal batay ak mache nwa y ap fè pou pyès sila yo anndan biwo yo, sitou imigrasyon ak Ofis Nasyonal Idantite (ONI).
«Fas ak afliyans, gouvènman an te bay imigrasyon mwayen pou l ouvri plis biwo, men sa pat sifi. Se sa ki fè nou akselere devlopman I-gouvènans lan e mobilize ekspè nasyonal nou genyen nan peyi a, pou kreye yon aplikasyon ki pra l fasilite tout sitwayen pran randevou an liy jan sa fèt lot kote», selon sa gouvènman an enfòme.
Atik sa se pwopriyete prive ©️ Gwoup Medya MAGHAITI 2023
