Nan yon bilan yo fè pou ane 2023 a, Sendika Polis Nasyonal la (SYNAPOHA) fè konnen sòti 10 janvye rive 19 desanm ane sa a gen 37 polisye ki rive mouri anba bal nèg ak zam. Konsa, yo soulinye pi gwo pèt enstitisyon an fè se nan mwa janvye pase a puiske nan sèlman kèk jou yo pèdi 10 polisye yon sèl kou.
“2 pi gwo kou PNH la pran ane sa a se 20 janvye nan Metivye(Petyonvil), ak 25 janvye nan Lyankou kote 10 polisye mouri nan 5 jou“. Daprè sa responsab yo di sou kont X (Twitter) yo.
Kether Louis, Mackès Badin, Donaldson Innocent, Norabert Aurélus, James Junior Félix, Camille Pierre, Stanislas Wikern, Octinal Gérald, Luc Elierzer, Cejuste Duckens, se non 10 polisye sa yo ki te tonbe nan Metivye ak nan Lyankou pou mwa janvye a.
Pami lòt polisye ki tonbe pandan tout mwa yo nou jwenn Willio Idocci, Marc Elie Azaël, Nicolas Robenson, Vladimir Marcelin, Jean Claude Orlens ki te youn aprè lòt fè pati 17yèm, 22yèm, 25yèm, 27yèm ak 31yèm pwomosyon lapolis la. Konsa tou genyen
Medèze Fortilien, Jean François Mackenson yo menm te sòti nan 26yèm pwomosyon tandiske Pierre Paul Junior Dorcely, Félix Fegens, Anescat Elixon te yo menm nan 28yèm pwomosyon an.
Pou sa ki konsène ajan ki sòti blese nan divès atak bandi fè sou yo pandan ane a, kòdonatè SYNAPOHA a, Lionel Lazarre, fè nou konnen gen plizyè men li soulinye yo poko gen chif ki disponib. Selon li menm, preyokipasyon yo nan enstitisyon an, e pou peyi a se jwenn solisyon ak ensekirite a ki jouskaprezan lakòz polisye ap plede mouri, men tou lakòz plis pase 1 600 polisye pati kite peyi a ane sa, Selon chif Biwo Entegre Nasyonzini(BINUH) bay.
“Pèspektiv yo anpil paske enstitisyon yo pap ka kontinye ap fonksyone konsa. Fòk tout moun ka gade kisa k ka fèt pou nou rezoud pwoblèm ensekirite a paske l konsène tout moun“, daprè deklarasyon kòdonatè SYNAPOHA a.
Atik sa se pwopriyete prive ©️ Gwoup Medya MAGHAITI 2023
