Nan yon kominike lameri Okap mete deyò jodi vandredi 3 me 2024 la, yo fè konnen glisman tè touye anviwon 10 moun sòti lannuit premye pou rive 2 me a. Ensidan malere sa, rive akòz lapli ki t ap tonbe nan zòn Labori.
«Premye rapò nou mennen sou teren apati pwoteksyon sivil ak ponpye, sinyale gen 9 moun ki mouri. Epi lòt glisman teren te pral lakòz lanmò yon moun ankò nan zòn rival», ekri ekip kominikasyon lameri Okap la. Pandanstan, yo te tou pwofite voye kondoleyans ak pwòch moun sa yo ki viktim ‘an.
Sou lòtbò, Inite Idwometeyowolojik D Ayiti(UHM) atravè Ministè Kilti ak Kominikasyon te anonse ayè 2 me a, yon avi inondasyon sou 8 depatman nan peyi a, sitou nan zòn Nò a.
Kidonk, lameri Okap la pwofite sikonstans sa pou l mande moun yo rete vijilan, epi suiv tout konsiy sekirite otorite pwoteksyon sivil yo bay. Yo rekòmande tou, pou moun yo pa fè okenn deplasman nan zòn ki gen menas sou yo, tankou deboulonnay tè.
Pou fini, komisyon minisipal di li deja ap travay pou li akonpanye sila yo ki frape anba inondasyon sa, epi fè tout jefò pou pote yo sekou. Yo soulinye y ap kontinye travay an kolaborasyon avèk diferan sèvis ijans yo epi òganizasyon lokal yo pou yo ka fè fas kare ak sitiyasyon sa.
Nap raple, selon UHM 8 depatman ki sou menas inondasyon ak glisman teren nan peyi D Ayiti yo se Grandans, Nip, Sid, Nò, Nòdès, Nòdwès, Lwès epi Sant.
Atik sa se pwopriyete prive © Gwoup Medya MAGHAITI 2024
