Nan yon nòt li fè sòti jodi vandredi 8 desanm 2023 a, sekretè jeneral Òganizasyon Nasyonzini (ONU) an, Antonio Gutteres, mande pou aktè ayisyen yo mete tèt ansanm pou jwenn yon solisyon politik k ap dire e ki pou retabli enstitisyon demokratik yo nan peyi a. Diplomat la kwè, akò sa l ap mande a kapab tabli yon leta kote yo respekte dwa moun, epi garanti yon sekirite k ap dire bon tan.
“Sekretè jeneral la peze sou enpòtans jwenn yon akò ap genyen sou mete kanpe enstitisyon demokratik yo, sa ki ta dwe vize bon jan eleksyon, yon fason pou n jwenn yon leta kote dwa ap respekte epi yon sekirite k ap la pou lontan. Li mande pou tout aktè politik ak lòt pati an Ayiti yo pou rasanble yo pou jwenn yon konsansis”, daprè sa ki di nòt la.
Pi lwen nan kominike sa ki pote siyati pòt Pawòl sekretè jeneral ONU an, Stéphane Dujarric, diplomat pòtigè a fè konnen li gen gwo enkyetid puiske dyalòg ant aktè ayisyen yo poko janm ka bay bon rezilta, malgre kominote CARICOM nan ak BINUH ap fè kou yo konnen pou sa. Se konsa tou, li deklare l ap tann ak anpil enterè preparasyon misyon etranjè a fini yon fason pou ta vinn opere prese prese nan peyi Dayiti.
Pandantan sa, kòdonatris imanitè ONU an, Ulrika Richardson li menm fè konprann jouskounya malgre tout chache yo chache nan nivo entènasyonal la, se sèlman 33% yo jwenn nan 720 milyon dola vèt yo ap chache ede Ayiti a. Konsa nan deklarasyon li fè jodi vandredi 8 desanm nan, li presize se 5.2 milyon ayisyen pami yo 3 milyon timoun ki bezwen èd, kote gen 4.35 milyon ladan yo k ap soufri akòz ensekirite alimantè dènye nivo a.
Atik sa se pwopriyete prive ©️ Gwoup Medya MAGHAITI 2023
