Aprè dife fin pran nan mache kominal Gonayiv la nan lannuit lendi 3 pou rive jodi madi 4 jen 2024 la, plizyè abitan fè konnen anpil machandiz yo pase anba flanm dife nan mache a. Daprè sa kèk machann fè konnen, lè dife a te eklate a okenn ponpye pa t fè entèvansyon pou etèn dife a.
«Tout moun ki gen machandiz anndan an tout boule nèt. Dife a pran nan lè minui, gen machann ki te dòmi nan espas la men yo pa gentan fè anyen», se deklarasyon youn nan machann yo. Li ajoute pou l di jiskounye a pa gen pyès moun ki ka bay eksplikasyon sou sa ki lakòz dife a.
Yon lòt kote, divès lòt machann montre lapèn yo fas ak sitiyasyon sa. Yo fè konnen nonsèlman yo pèdi machandiz yo, men tou, yo nan obligasyon pou remèt lajan yo te prete labank.
«Nou fè defisi, pran kòb labank, kounye a tout kòb sa yo pèdi nèt paske se nan kredi n ap viv.» Nan sans sa, machann sa yo leve vwa yo pou mande sekou ak otorite yo, yon fason pou ede yo avèk lajan machandiz sa yo yo rive pèdi a.
Menmsi gen te gwo mannèv bò kote popilasyon an pou te eseye etèn dife a, machann yo pa sispann kritike otorite yo nan meri Gonayiv la ki daprè yo menm pa janm voye ponpye vin ede yo. Pou reponn ak akizasyon sila a, Quesner Pierre Charles ki se direktè egzekitif meri a deklare kamyon pou etèn dife yo pa fonksyonèl, sa ki fè kò pmpye a pa t ka aji nan ka sa.
«Si gen demach ki pou fèt pou rekapitalize yo meri a ap fè sa bò kote ministè Enteryè ak Finans pou pèmèt moun yo ki viktim yo retounen nan mache a ankò », daprè pwomès responsab la fè jodi a aprè evènman an fin pase nan mache a. N ap soulinye, dife pran nan espas sa plizyè fwa deja kote sitiyasyon an pa t janm diferan pa rapò ak kounye a.
Atik sa se pwopriyete prive ©️ Gwoup Medya MAGHAITI 2024
