Anbasad peyi Etazini nan pòtoprens kondane nan yon nòt tout zak vyolans, sitou dechoukay k ap fèt pandan manifestasyon san rete nan peyi a.
“Peyi Etazini kondane ak tout fòs li zak vyolans ak piyaj epi zak destriksyon ki fèt nan dènyè jou sila nan peyi Dayiti ak tout moun ki evènman sila yo nan enterè pèsonèl yo. Nou swete tout Ayisyen eksprime opinyon yo nan yon fason pasifik ki respekte aktè k ap travay nan sektè imanitè yo ak lapolis. Anplis, pou penmèt Ayisyen ki nan bezwen gen aksè san difikilte pou jwenn manje, dlo ak swen medikal “. Deklarasyon anbasad Etazini.
Pilwen nan nòt la, Anbasad la fè konnen menmsi yo te mobilize plis pase 294 milyon dola pou Ayiti depi nan mwa desanm pase a. Li toujou pwomèt soutyen li nan ka ijans yo patikilyèman nan fon komen Nasyonzini ak peyi Kanada te kreye a.
Aprè li pwofite mande tout Ayisyen antann yo sou yon akò politik ki ta mennen nan eleksyon konsa yon gouvènman eli demokratikman ta pran tèt peyi a.
N ap raple tout manifestasyon ki mennen dechoukay k ap fèt san rete nan peyi a, se nan objektif pou mande yon lavi miyò, kont ensekirite, lavi chè, ratman gaz men sitou pou mande Ariel Henry kite tèt peyi a.
Pa bliye menm Etazini k ap mande pou Ayisyen kreye bon kondisyon pou yon Gouvènman ki eli demokratikman pran fonksyon li, sanble se pi gwo fòs k ap kore Ariel Henry, dayè plizyè bagay montre se yo ki t ap ede l pran pouvwa a.
Daniel Foote ki se ansyen Anvwaye espesyal Etazini aprè asasinay prezidan Jovenel Moïse. Li te rive fè konnen nan yon entèvyou ak New York Post, Ariel Henry te menm mete l dakò ak depòtasyon plizyè milye Ayisyen ki te anba pon Del Rio nan Texas nan objektif pou li jwenn sipò prezidan Biden.
Daniel Foote te deklare tou depi lè Ariel Henry aksepte tout depòtasyon ki te fèt yo, gouvènman Ameriken an pa janm fè pyès presyon pou demokrasi retabli nan peyi D’Ayiti.
Atik sa se pwopriyete prive ©️ Gwoup Medya MAGHAITI 2022
