Aprè Sena ameriken an fin konfime nominasyon l kòm anbasadè an Ayiti, responsab ameriken yo anonse jodi lendi premye avril 2024 la, nouvo anbasadè ameriken an Dennis Hankins rive Ayiti. Malgre li poko antre an fonksyon, diplomat la gentan pwomèt l ap yon bon alye pou pèp ayisyen an sitou nan moman kriz sekiritè a.
“Anbasadè ekstraòdinè ak plenipotensyè peyi Etazini nan Repiblik Dayiti, Dennis Bruce Hankins, rive an Ayiti nan dat 26 mas 2024 la. Ambasadè Hankins ap tann avèk enpasyans pou l pran fonksyon li ofisyèlman lè li fin prezante lèt kreyans li yo jan pwotokòl diplomatik la mande sa“, daprè kominike responsab yo nan anbasad la sòti jodi a.
Ambasadè Hankins se diplomat ki travay kòm manm sèvis zafè etranje peyi Etazini. Depi nan lane 1984, li te sèvi nan peyi Brezil, Taylan
n, Soudan, Ayiti, Repiblik Demokratik Kongo, Pòtigal, Mozanbik, Arabi Sawoudit ak Moritani. Daprè sa yo mansyone, sitwayen an te sèvi tou kòm anbasadè ameriken nan peyi Gine ak Mali, li te sèvi kòm Direktè Adjwen nan Biwo pou prezève lapè ki anndan Biwo Oganizasyon Entènasyonal yo.
Pou sa ki gen pou wè ak lang li pale, responsab ameriken yo presize li pale twa lang . Ki se daprè yo fransè, pòtigè, ak endonezyen.
Annatandan li kòmanse travay, diplomat ameriken an fè konprann li deja pare pou l kolabore ak pèp ayisyen an, se pou sa li deklare pawòl sa yo konsa: “Mwen pran angajman pou m travay ak ekip mwen nan Anbasad Amerikèn nan, avèk kolèg nan Washington DC yo, epi sitou ak prensipal pati konsène Ayisyen yo pou asire n nou aprann istwa nou gen ansanm nan, n ap tande bezwen ak dezi tout vwa yo nan peyi Dayiti, epi Etazini ap kontinye rete yon patnè epi sipòte nan jefò Ayisyen yo ap fè pou retabli lòd demokratik nan peyi a, abode kesyon dwa moun nan, epi garanti yon Ayiti ki gen plis pwosperite epi ki pi estab pou pèp Ayisyen an. Ayiti merite lapè, sekirite, ak pwosperite”.
Atik sa se pwopriyete prive ©️ Gwoup Medya MAGHAITI 2024
