Nan yon rapò yo pibliye ayè jedi 10 oktòb 2024 la, Fondasyon Je Klere (FJKL), fè konnen sosyete sivil nan depatman Latibonit la te fè kou yo konnen pou te evite masak Ponsonde a. Kidonk, yo fè konprann se otorite nan leta yo ki pa t vle evite tiyo san sa ki te debouche nan lokalite a 3 oktòb pase a.
« Sosyete sivil la deside peye lajan an. Yo depanse prèske 30 mil dola vèt pou repare nan Pòtoprens cha blende ki te sou pòs nan Latibonit la, men ki te an pàn », daprè sa yo di pandan yo soulinye se otorite yo menm ki te di yo pa gen mwayen. Fondasyon an di menm gwoup moun sa yo te kontakte Konsèy Prezidansyèl Tranzisyon an (KPT), laprimati ak tout Direksyon Jeneral Lapolis la, men anyen pa t janm fèt.
Mete sou sa yo, estrikti a kontinye pou di menm lajan transpò cha blende a se moun Latibonit ki te peye l 2 jou avan masak la. Poutan, malgre tout jefò sa yo blende a pa t janm rive jwenn moun yo jous masak la fèt nan Ponsonde kote plis pase 115 moun mouri, plis pase 100 lòt blese ak kay ki boule.
Pandantan sa, FJKL rapòte avan masak sa a te gen plizyè zak gang Savyen an te poze, kote yo te menm anonse malè pandje a sou tèt popilasyon an. « Tout sa yo pase san polisye Ponsonde yo pa t levé ti dwèt yo, yo te pran pretèks yo pa gen mwayen pou yo aji », daprè sa ki ekri nan dokiman 8 paj sa a.
Pami evènman sa yo nou jwenn nan yon premye tan : gwoup rezistans Ponsonde a ki te kanpe fas ak gang Gran Grif la pou di non ak pòs peyaj chèf gang Luckson Elan mete nan Kafou Pèy. Sa ki te vin lakoz gang yo atake madi 24 septanm nan Kafou Kado. Nan atak sa a, 5 moun te rive pèdi lavi yo, gang yo te boule plizyè kay e te pote ale plizyè moto yo te jwenn nan zòn nan.
Nan yon lòt tan, Fondasyon Je Klere mansyone nan jou ki te vin aprè yo te gen gwo afwontman ant gang gran grif la ak gwoup rezistans Ponsonde a.
Nan sans sa, FJKL denonse otorite yo nan leta a dèske avan masak la yo pa t poze okenn aksyon. Tandiske pi devan òganis la deklare : « Lè masak la fin fèt la otorite yo voye 11 cha blende nan Latibonit, pandan yon grenn sèlman t ap sifi pou evite masak la ».
Atik sa se pwopriyete prive © Gwoup Medya MAGHAITI 2025
