Aprè piblikasyon rezolisyon ki te nonmen l nan jounal le Moniteur a, Alix Didier Fils-Aimé ofisyèlman enstale kòm nouvo premye minis peyi a. Enstalasyon sa fèt nan Vila Akèy la jodi lendi 11 novanm 2024 la, nan prezans plizyè gwo tèt nan gouvènman an.
« M pa nan klivaj politik, m pa nan moun anwo, m pa nan moun anba. Tout moun ap mete men, e tout moun ap pran responsabilite yo », se premye deklarasyon nouvo chèf gouvènman an ki bay tèt li misyon pou òganize eleksyon nan peyi a.
Pi lwen, li fè konnen pi gwo dèt li genyen anvè nasyon an jounen jodi a se « sekirite ak eleksyon ». Pandan tan sa, li te pwofite voye yon panse espesyal pou viktim vyolans gang yo sitou sila yo ki te tonbe nan masak Ponsonde ak nan atak ki fèt nan Solino ak zòn sou kote l yo.
« Gouvènman m nan angaje l pou kenbe tout sa ki te byen fèt epi amelyore tout sa k merite l. M angaje m pou mete linyon nan mitan 2 branch egzekitif la nan lide pou n mache ansanm nan wout k ap garanti sekirite pou mennen ak eleksyon yo », toujou daprè sa chèf leta a deklare. Se konsa tou, li mande ak kominote entènasyonal la pou ede gouvènman sa a ak tout Konsèy la pou Ayiti ka sòti nan sitiyasyon li ye a.
N ap fè konnen, nan seremoni sa ki te chaje ak gwo tèt ladan l tankou manm Konsèy Prezidansyèl Tranzisyon yo, direktè lapolis la, Rameau Normil, reprezantan fòs miltinasyonal la, ansyen premye minis Garry Conille pa t mete pye. Dayè, aprè korespondans li te voye bay Konsèy la pou montre li pa dakò ak revokasyon li an, ansyen direktè rejyonal UNICEF la pa t fè tèt di. Li te pito ranmase tout afè l avan menm Konsèy la te enstale Alix Didier Fils-Aimé jodi a.
Atik sa se pwopriyete prive © Gwoup Medya MAGHAITI 2025
