Sekretè sekirite enteryè ameriken an, Alejandro Mayorkas, anonse otorite ameriken yo pral voye tounen Ayisyen ki rive Etazini yo sou bato. Konsa li konfime, administrasyon Biden nan pa gen entansyon pou pwolonje Estati Pwoteksyon Tanporè (TPS) pou resòtisan Ayisyen sa yo.
Nan yon entèvyou li bay gwoup McClatchy, ki se pwopriyetè Miami Herald la jodi vandredi 5 avril 2024 la, Mayorkas dekouraje migran ayisyen k ap kouri pou vyolans gang nan peyi yo, pou yo pa tante pran lanmè pou antre Etazini.
Men konsènan TPS la, fonksyonè ameriken an te presize pa gen okenn chanjman nan TPS pou ayisyen yo. TPS la ofri souvan pwoteksyon kont depòtasyon epi akòde pèmi travay ak imigran ki kite peyi yo pou kriz politik oswa evènman natirèl. Li te presize tou, gad nasyonal yo gentan voye tounen nan peyi yo migran ayisyen yo te kenbe yo.
12 mas ki sot pase a, otorite federal yo te arete 65 ayisyen touprè Great Inagua, nan Bahamas. Nan mwa mas la, malgre sitiyasyon sekiritè ak imanitè peyi a vin pi mal, se anviwon 13 000 migran ayisyen otorite peyi vwazen yo refoule nan peyi Dayiti. Yon chif ki ogmante ak 46% konpare avèk mwa fevriye a, daprè Òganizasyon Entènasyonal Migrasyon (OIM).
© Tous droits réservés – Groupe Média MAGHAITI 2024
