Akademi Kreyòl Ayisyen an (AKA) selebre jounen Jedi 21 fevriye 2019 la jounen entènasyonal lang matènèl anba tèm : “An nou travay pou kreyòl vin Lang ofisyèl peyi a tout bon vre“.
Nan okazyon sila a, Akademisyen Pierre André Pierre ki se Prezidan akademi an lanse yon mesaj bay pèp ayisyen kote li raple yon pakèt prejije lang kreyòl la viktim anndan peyi a.
Akademisyen an rekonèt yon pakèt diferans ki genyen ant sa ki ekri nan manman lwa peyi a ak reyalite lengwistik pèp ayisyen an depi plis pase 30 lane manman lwa peyi a rekonèt kreyòl tankou lang ofisyèl. Daprè li, pa gen okenn mezi Leta pran pou fè l jwe wòl li tout bon vre nan sosyete a.
Yon lòt bò, pandan li fè sonje tout diskrimasyon ki fèt sou lang kreyòl la nan anpil sektè devlopman peyi a tankou Ledikasyon, Administrasyon peyi a, lajistis, politik elatriye, Akademisyen an mande tout enstitisyon peyi Dayiti alawonnbadè, prive kou piblik pou travay pou Lang kreyòl la vin Lang ofisyèl peyi a tout bon vre.
Malgre tout difikilte sa yo prezidan akademi kreyòl la rete kwè li enpòtan anpil e se yon obligasyon pou tout Ayisyen respekte dwa lengwistik li. Sa ap pèmèt ayisyen an santil gen valè kote l pase.
Jackson MÉRINOR
© Tous droits réservés – Groupe MagHaiti 2019
