Jou ki te samdi 24 dawout 2024 la, ajan imigrasyon dominiken yo te voye tounen sou fwontye Beladè a, 395 ayisyen pami yo yon evade prison ki t ap viv Sendomeng.
Ajan imigrasyon yo ki t ap remèt Ofis Nasyonal Migrasyon (ONM) moun sa yo te tou pwofite remèt bay Polifront Saint Germain Mamiou ki se yon evade prizon. Endividi sa akize kòm moun ki ta nan blanchi byen moun e li ta nan asosiyasyon malfektè.
Daprè Claudel Vincent ki se yon ajan ONM, dominiken yo te fè yo konnen yo ap vini ak yon evade pou yo ka avèti Lapolis. Li soulinye tou Polis Nasyonal Ayiti (PNH) te mete chache sispèk sa e se sa ki koz imigrasyon dominiken rive idantifye l.
Pou sa ki konsène rès migran yo, genyen yon total 49 fanm, 7 tifi ki sòti nan laj 6 pou rive 17 lane, 11 ti gason ki genyen laj 6 a 17 lane ak 327 gason.
Claudel Vincent ki pa kache preyokipasyon l sou fason dominiken yo ap voye tounen Ayisyen yo nan peyi a mande ak leta a pou pran responsablite l fas ak sitiyasyon sa. Pou ajan ONM nan, tretman konpatriyòt yo ap sibi sitou lè yo pran yon tibebe 2 mwa mete nan machin sa fè pati vyolasyon dwa moun.
Pi lwen, li kritike jan ajan imigrasyon yo pa respekte akò ki pase sou politik jou yo dwe fè depòtasyon an. Daprè sa l di dominiken yo vyole akò sa lè yo vle paske yo deside voye ayisyen tounen nan jou samdi .
Atik sa se pwopriyete prive ©️ Gwoup Medya MAGHAITI 2024
