Yon lane depi bandi ak zam te fè anpil moun kouri kite kay yo nan Kafoufèy, abitan nan plizyè katye nan Pòtoprens manifeste jounen madi 13 dawout 2024 la. Daprè revandikasyon yo fè pase, manifestasyon sa te fèt nan lide pou fòse otorite yo mete sekirite nan peyi a yon fason pou yo ka tounen lakay yo.
Prezidan abri ki nan Rèks Teyat la, Célicourt Duckenson ki t ap patisipe nan mach sa deklare li te la se pou fè otorite yo konnen moun sa yo paka fè vi yo nan abri. Mesye Célicourt mande ak leta santral pou yo pran responsablite yo fas ak moun sa yo ki pa gen pyès moun k ap ede yo a.
Prezidan kan refijye a ki santi li konsène ak sitiyasyon moun sa yo, mande ak leta pou l mete sekirite nan peyi a pou moun yo ka tounen lakay yo. Se konsa daprè li, yo ap ka kreye yon fason pou timoun yo, ki gen kèk tan chita, tounen sou ban lekòl.
Kèk moun ki t ap patisipe nan evènman sa deklare yo ap fè fas kare ak pwoblèm grangou nan kan yo. Nan sans sa, yo mande ak Kès Asistans Sosyal (CAS) epi Ministè zafè sosyal pou voye je gade yo.
sa se pwopriyete prive ©️ Gwoup Medya MAGHAITI 2024
