Akoz sitiyasyon ensekirite ki gen nan komin Gresye depi prèske 2 mwa, plizyè abitan k ap soti nan gran Sid peyi a oblije monte bato pou antre nan kapital la.
Antre Sid peyi a ap konnen yon sitiyasyon difisil depi plis pase 2 lane, akoz nèg ak zam vin kontwole 70% nan komin Gresye li vin pi konplike pou moun k ap frekante wout nasyonal nimewo 2 a.
Nan kèk videyo ki pibliye sou rezo sosyal yo, nou konstate divès abitan k ap sòti nan gran Sid peyi a oblije pran bato pou yo rantre nan kapital la. Selon deklarasyon kèk nan yo, se akoz sitiyasyon komin Gresye a ki fè yo pran bato.
Youn nan pasajè yo ki fè konnen li stòi Okay rapòte li pran yon bis nan vil la, lè bis la rive Tigwav, li pran bato. Efektivman, nan plizyè videyo moun yo mete sou Tiktok pou montre nan ki kondisyon y ap vwayaje pou vini Pòtoprens nou remake gen machin sou bato yo.
Aprè anviwon 15 jou gouvènman an te deklare eta ijans sekiritè sou deptaman Lwès ak Latibonit, anyen pa chanje. Sitiyasyon sekiritè peyi a vin pi mal chak jou pi plis. Nèg ak zam kontinye pran konfyans epi fè plis viktim anba je otorite nou yo, tankou sa te rive nan komin Gantye.
sa se pwopriyete prive ©️ Gwoup Medya MAGHAITI 2024
