Aprè yo finn deside relouvri liy ayeryen yo a ak Ayiti, prezidan dominiken an, Luis Abinader fè konnen ayè lendi 30 oktòb 2023 a, se pa tout ayisyen k ap ka itilize espas ayeryen yo a pou al nan lòt peyi. Selon Listín Diario, Chèf leta a presize se sèlman pèsonèl diplomatik yo ak Ayisyen ki peye biyè avyon yo avanlè k ap ka vwayaje sòti Ayiti/Sendomeng osnon Sendomeng/Ayiti.
“Abinader presize ti men leve yo fè sou restriksyon ki te pran yo ap aplike sèlman pou pèsonèl diplomatik la ak sa ki peye biyè avyon yo avanlè”, se sa jounal la fè konnen pandan yo fè konprann prezidan an vize fè l konsa se toujou nan kad pou gen plis kontwòl sou vòl yo.
Pandantan sa, premye sitwayen dominiken an di konsa depi avan menm yo te pran desizyon pou otorize vòl k ap sòti Ayiti/Sendomeng osnon Sendomeng/Ayiti ayè lendi a avèk siyati rezolisyon 234-2023 a, te gentan gen plizyè Ayisyen san viza dominiken ki te fè rezèvasyon vòl pou ale nan divès vil nan peyi yo a.
N ap raple se menm Luis Abinader ki te deside fèmen tout fwontyè ak Ayiti depi aprè divès ayisyen nan Wanament te pote kole pou konstui yon kanal k ap jwenn sous li nan rivyè masak la(rivyè binasyonal). Poutan, jounen jodi a tousuit aprè gouvènman ayisyen an sispann tout vòl ki sòti Ayiti/Nikaragua, gouvènman dominiken an li menm tou profite chanje klan.
Atik sa se pwopriyete prive ©️ Gwoup Medya MAGHAITI 2023
