Ayè lendi 8 me 2023 a komisè gouvènman Tribinal Premyè Enstans nan komin Gonayiv deklare rezon ki fè li te libere Williams Raymond manm gang «Kokorat San Ras la».
«Aprè plis pase 2 lane Enstriksyon Afè jij Dénis Pierre Michel la te pral rann yon òdonans « non lye» pou mande mete prizonye sa deyò. Òdonans sa te sòti Oktòb 2021», selon sa Mèt Sérard Gazius te deklare nan bout videyo sa.
Williams Raymond se youn nan manm gang « Kokorat San Ras» ki te pral jwenn arestasyon li an 2018, kote lajistis te pral jije li epi mete li nan prizon pou zak vòlè ak zam sou mè misyonè katolik nan komin Lestè.
«Nou gen Williams Raymond ki te arete pou dènyè ane 2018 ak 2019, sou lòd jij Pierre Michel. Li te arete nan kad dosye vòl sou moun », rezon ki te nan chaj dosye prizonye sa selon komisè gouvènman Sérard Gazius.
Gwoup bandi «Kokorat San Ras» k ap opere nan lokalite Lakwaperis gentan asasinen plizyè polisye nan Lyankou epi sezi plizyè byen ak kidnape divès moun nan Komin Gonayiv. Alòske Williams Raymond te pral jwenn liberasyon li kòm manm aktif gwoup gang sa.
«Nan sousi pou ede moun, nan sousi gen moun nan prizon si n pa fè anyen pou li, l ap mouri nan prizon, konsa tou gen moun ki swete gen anpil moun mouri nan prizon an. Menm lè n ap fè jefò pou libere moun sa yo anba gwoup moun ki pran plezi nan kenbe yo nan prizon», toujou selon sa komisè gouvènman Gonayiv la te avanse.
N ap raple atravè yon twit sou rezo sosyal yo, komisè gouvènman Gonayiv la te pral wè li ranplase epi mete an disponibilite lajistis ayè lendi 9 me 2023 a.
«Se sou rezo sosyal mwen wè yo ranplase m, men jiskaprezan moun nan pa genyen yon lèt ajan enterimè (A.I) nan men li. Anplis, jis kounya Direksyon Afè Jidisyè pa di m yo genyen yon bagay konsa kont mwen. Men se pito rapò m gen pou voye pou yo», pou mete yon bout atravè konferans Sérard Gazius te bay atravè medya nan Komin li an.
Atik sa se pwopriyete prive ©️ Gwoup Medya MAGHAITI 2023
