Nan yon konferans pou laprès jounen ji lendi 24 avril 2023 a, pòt pawòl lapolis Nasyonal la Garry Desrosiers fè konnen Carlo Petit-Homme alyas ti Makak te pèdi lavi li aprè dènyè operasyon Lapolis t ap mennen 9 avril ki sot pase a nan Laboul 12, Enfòmasyon sa konfime rimè ki t ap sikile depi plizyè jou sou lanmò Ti Makak.
«6 fizi ak radyo kominikasyon, 30 machin, 7 motosiklèt, 1 jeneratris elektrik, 3 kadav rekipere. Anplis plizyè moun libere ak plizyè bandi mouri nan kad operasyon sa», se bilan pwovizwa pòt pawòl polis la Garry Desrosiers bay nan kad konferans lan konsènan materyèl yo pran, moun ki mouri ak viktim yo libere.
Chèf gang Ti Makak ki t ap dirije Laboul 12 ak plizyè lòt lokalite depi konbyen tan, gen akizasyon zak kidnapin ak asasina sou do li. Li te pral touche anba bal Lapolis nan kad entèvansyon nan dat 9 avril 2023 nan komin Petyonvil, presizeman zòn Tomasen.
«Prezime asasen an te pral blese anba bal pandan afwontman Lapolis nan kad operasyon ki t ap mennen kont gang nan zòn Laboul 12, sou komin Petyonvil», selon sous ransèyman Lapolis la.
Pandanstan, n ap raple non gwoup gang Ti Makak la te site nan dènyè zak asasina 3 polisye nan dat 9 Avril 2023 a.
Sou lòtbò a PNH fè konnen li te arete plizyè jèn gason anndan yon ti bis ki t ap pran direksyon kanapevè, alòske popilasyon an ta pral touye prezime koupab sa yo jounen jodi 24 avril sila.
Atik sa se pwopriyete prive ©️ Gwoup Medya MAGHAITI 2023
