Prezime bandi ki fè pati gwoup Kanaran ak Titanyen rive atake prizon fanm yo nan zòn kabarè jodi mèkredi 19 avril, kote yon polisye ki afekte anndan an sòti blese. Ajan nan prizon an te nan gwo difikilte pou pote polisye sa sekou akòz rafal bal nèg ak zam yo t ap tire, selon Marie Yolenne Gilles.
Daprè sa Defansè dwa moun nan konfime Mag Haïti, prezime bandi yo te anvayi zòn nan byen bonè kote yo te koupe wout la pou anpeche lapolis rive, te gen anpil tire sa ki fè yon ajan blese. Li fè konnen tou pa gen lòt viktim pou moman an.
Yon lòt bò, nan plizyè videyo sou rezo sosyo yo, nou ka wè plizyè moun nan zòn sous matla ki t ap kouri kite kay yo anba rafal katouch ki t ap tire yo. Nan menm sans sa, gen plizyè lòt zòn ki te sou tansyon jounen mèkredi sa, nou ka site Onavil, Sous matla ak Meyòt.
Pou kounya okenn lòt enfòmasyon pa disponib pou ta konnen idantite polisye sa ki blese a, ni pou ta konnen si rive gen viktim nan bò popilasyon an.
N ap raple se pa premye atak nèg ak zam fè sou prizon sivil Kabarè a, dènye fwa sa te fèt te rive gen 145 prizonye fanm ki te sove nan dat ki te 22 septanm 2022, sa ki diferan pou jodi a puiske komisè divizyonè ki responsab administrasyon prizon an, Pierre René François konfime pa gen okenn prizonye ki sove ni blese.
Atik sa se pwopriyete prive ©️ Gwoup Medya MAGHAITI 2023
