Jounen jodi lendi 20 mas 2023 a, omwen 9 moun mouri nan maten byen bonè nan lokalite Kago ak Tinèl nan komin Petyonvil, ladan yo ta gen 5 chofè kamyonèt ak 4 lòt moun. Anplis plizyè lòt moun pati kouri kite kay yo akoz kout bal prezime asasen yo.
Premye enfòmasyon yo ta fè konnen se gwoup gang «Kraze baryè» Vitelhomme Innocent ap dirije a ki ta vin tire revanch pou kèk sòlda li ki te mouri ayè dimanch nan zòn wout frè, presizeman nan zòn Kago.
Anplis, plizyè zòn nan komin Petyonvil leve sou gwo panik ak tansyon maten an, kote gwoup gang kontinye ap tire san rete epi simen laperèz nan plizyè lokalite, tankou Meyòt, Pènye, Jirado, Fò Jak, Wout Frè, Dyèg, Tinèl, Kago, elatriye.
N ap raple minis defans kanadyen an Anita Anand te anonse ayè dimanch 19 mas la, misyon bato wayal kanada yo fini sou lanmè ayisyen an. Malgre sanksyon Etazini ak Kanada bay kèk pèsonalite ayisyen, sitiyasyon ensekirite a pa janm rezoud.
Atik sa se pwopriyete prive ©️ Gwoup Medya MAGHAITI 2023
