Kontrèman ak fason Jean Léonard Tout-puissant alyas “Izolan” te kanpe pou l pa te patisipe nan kanaval ki te dwe fèt nan ane 2020 an pou ensekirite, poutan jounen jodi a atis la deklare nan kèk medya lokal, li paka rete kokobe nan tann sitiyasyon peyi a amelyore.
Nan eksplikasyon atis la bay yo, li fè konprann sou administrasyon Jovenel Moïse la se pa te koze ensekirite ki te fè l pa te dakò ak òganizasyon kanaval nan peyi a, men se te pito sitiyasyon pandemi Kowona viris la te mete nou an.
“Lè m te konn di pa te ka gen kanaval sou Jovenel la pa te gen mwayen pou gen vre paske epòk sa te gen Kowona anraje, se pa te ensekirite ki te fè m di paka gen kanaval. Jodia, si leta pa deside fè peyi a mache, mwen menm mwen paka ret kokobe, fòk mwen fonksyone“, se sa l te deklare pandan 2èm jou kanaval 2023 a, ki fèt anba tèm “rekonsilyasyon pou lapè” nan lakou pòtoprens.
Yon deklarasyon ki diferan pa rapò ak pòs chantè Baricad Crew an te fè nan dat ki te 23 janvye 2020 an, ki montre klè agiman atis la te jwenn baz li nan ensekirite ki te kòmanse ap layite kòl nan peyi a.
“Pou jan san ap koule la, ensekirite tout kote, kidnapin, moun ap mouri, timoun pa epanye polisye ap tonbe, èske nou panse se yon moman pou n al pran plezi?“, Daprè twit Izolan te fè.
Yon lòtbò, toujou pou kore desizyon li dèske l chwazi pefòme pandan pakou kanaval la ane sa, otè “Pye m mele a” soulinye li pa gen pou l fè pyès moun plezi, paske l vle fè sa k ap bon pou li ak sa k ap bon pou peyi a.
N ap raple Izolan te pami anpil atis ki te deside tanmen yon mach, nan dat 13 oktòb 2019 pase a kont ansyen prezidan Jovenel Moïse. Mach sa te fèt nan lide pou te mande chèf leta a pou bay tèt pouvwa a akòz yo te estime l pa te gen kapasite pou jere kriz ensekirite, grangou, kidnapin nan epòk la. Sitiyasyon ki pa chanje 4 lane aprè, puiske gang yo kontinye gen kontwòl prèske tout rakwen peyi a.
Atik sa se pwopriyete prive ©️ Gwoup Medya MAGHAITI 2023
