Marie Rosie Auguste Ducéna, asistan Rezo Nasyonal Dwa Moun (RNDDH) te fikse pozisyon estrikti li ye a parapò avèk zak ensekirite k ap ravaje peyi a sou radyo Magik 9, jounen jodi samdi 28 janvye 2023 a.
Selon sa manm RNDDH la fè konnen :« Rezo Nasyonal Dwa Moun panike menm jan avèk popilasyon an degradasyon sitiyasyon ensekirite peyi a, nan gwo degradasyon sitiyasyon sa ki chita kò li sou asasina, kadejak, kidnapin. Nou rannkont se polisye yo ki veritab sib sistematik bandi yo.»
Depi aprè lanmò 7 polisye nan komin Gonayiv, presizeman Lyankou, plizyè enstitisyon te reyaji parapò avèk zak asasina bandi yo sou polisye yo anndan peyi a, sa ki te mennen yon kokennchenn soulèvman atravè vil pwovens ak kapital la.
Responsab RNDDH, Marie Rosie Auguste Ducéna te ajoute pou li di :« Se nan moman pou polisye ta dwe pi fò, paske piwo otorite egzekitif la peyi a se prezidan Konsèy Siperyè Polis Nasyonal la, poutan se kontrè a. Paske, bandi ak zam yo vin pi puisan, y ap aji odetriman enstitisyon polis la. Bandi yo vin pi awogan nan mòd operatwa yo.»
Bandi nan prèske nan tout kò peyi a pa sispann simen latwoublay ak koze zak kriminalite, pandan premye minis defakto Ariel Henry, poko janm ka pran okenn bon jan desizyon pou kwape yo « Depi aprè jiyè 2021, lè Ariel Henry pran tèt leta ak tit premye minis defakto, nou fè dekont anviwon 78 polisye ki mouri, sitou asasinen. Kidonk, an mwayenn 5 polisye chak mwa», selon responsab la.
Nan dènyè bilan òganizasyon dwa moun nan fè sòti, gen 14 polisye ki gentan asasinen, 2 blese ak bal epi 2 disparèt pou jiskounya :« Listwa ap kenbe yo pa te janm pwoteje lavi jenn gason ak jenn fanm nan peyi a, sitou dila yo ki te vle sèvi ak pwoteje peyi a», toujou selon asistans òganizasyon dwa moun lan.
Sou lòtbò pouvwa anplas la, pa sispann mande kominote entènasyonal yo yon sipò militè etranje pou li vin ede l konbat bandi nan peyi a, k ap vyole ak kidnape moun chak jou.
Responsab RNDDH, Marie Rosie Auguste Ducéna, te avanse pou li di :« Jodia òganis lan kwè degradasyon sitiyasyon sekirite nan peyi a, genyen yon objektif prensipal pou jistifye plan makab entèvansyon militè etranje yo. Kidonk, Lapolis se veritab doulè ak sib yo otorite nan leta a.»
Rezo Nasyonal Dwa Moun (RNDDH) kondane zak asasina k ap fèt an seri yo, sitou se pa sèlman ane sa men plizyè lòt lane anvan yo. Anplis, òganis lan pwofite senpatize avèk yo epi konprann fristrasyon yo aprè asasina kòlèg travay yo.
Atik sa se pwopriyete prive ©️ Gwoup Medya MAGHAITI 2023
