Alòske tout lekòl ta sipoze ap fonksyone nan kapital la, jounen vandredi 27 janvye 2023 a anpil lekòl pa rive louvri pòt yo. Nan sans sa, popilasyon an ret an sispan pou konn kijan jou yo pral pase akòz kòlè polisye yo ki ta vle plonje peyi a nan yon lòt peryòd lòk.
Menm jan sa te kreye yon panik lakay paran ak elèv yo ayè jedi 26 janvye a, aprè polisye yo te finn pran lari pou denonse zak ansasinay 7 polisye parèy yo nan lokalite lyankou, ta gen yon santiman enkyetid maten vandredi 27 janvye sila, kote paran yo pa pran ris voye pitit yo lekòl.
Nan yon lòt bò, malgre plizyè lekòl pa rive fonksyone maten an, aktivite machann yo kòmanse reprann divès kote nan kapital la. Pandantan sa, gen yon pati nan popilasyon an ki eksprime enkyetid yo tou pou sitiyasyon sa pa mennen peyi a nan yon lòt peryòd lòk.
Pou kounya, pèsonn pa konnen kòman evolisyon sitiyasyon an kapab ye pou jounen an, lè n konsidere enstitisyon polisyè a ki poko ka rekipere kadav 7 polisye yo nan baz prezime bandi savyen yo.
Atik sa se pwopriyete prive ©️ Gwoup Medya MAGHAITI 2023
